Linük temzüng aser democracy lendong nung lir: Ashok Gehlot

Jaipur (Rajasthan), Monupii/ May 03 (Agencies): Rajasthan Chief Minister, Ashok Gehlot-i, India linük temzüng aser democracy lendong nung lir, kechiyong Central sorkar anema langka danga jembira ibaji linük anemba lir, ta aitsür, ta metetdaktsü.
Paisa Ato kilonser, Narendra Modi-i pa anema tashishitsü o jembiba atema aitsü.
Lok Sabha election atema nüboyim sentong ka nung jembidang Gehlot-i, “Linük tesem ajunglen tetsübu aser tesempa lir. Sorkar anema langka danga jembira ibaji linük anemba lir ta aitsür. Linük temzüng aser democracy lendong nung lir,” ta ashi.
“Ni Pakistan nunger oshi nung jembir, ta Modi-i shiogo. Democracy linük ka nung Chief Minister ka anema iba ama tashishitsü o jembitsü pa dak temeden mali,” ta paisa ashi.
Kasa sentong nung Rajasthan Congress Tir aser Deputy Chief Minister, Sachin Pilot-ia, tesüiba küm pongu tashi BJP-i nüburtem ashioktsüogo aser tangbo parnoki votes bushir, ta ashi.
Sachin Pilot-isa, linük nung temelenshi aginüba mopungsem ka lir aser Congress-i sorkar akümtsü, ta ashi.