Linük temzüngi memela aka, ni Myanmar linük lenitsü: Suu Kyi

Myanmar opposition lenila, Aung San Suu Kyi-i Myanmar anülulentip tsütsü Aung Pan nung ayongba election nüboyimba sentong nung la pusemertem den ajurutepba noksa nung angur. (Aung Pan, October 07)

Yangon, October 07 (Agencies): Myanmar linük temzüngi memela aka, Myanmar opposition telok lenila, Aung San Suu Kyi-i lar Myanmar linük lenitsü lemtetba osang ka tanü Bodbar nü metetdaktsüogo.
“Myanmar linüki taküm November ita agitsü ayongba parliamentary election nung ozü National League for Democracy (NLD) yimtren teloki takok ngua sorkar tasenba tentettsü maongka ngura, ozü linük temzüngi memela aka, ni Myanmar linük lenitsü,” ta Suu Kyi-i tanü ashi.
Tan agitsü ayongba election sentong nung Suu Kyi-i aniba NLD yimtenren teloki parliament menden timba ajangzüktsü teimla yua lir aser par teloki tanüngba yimtenren telok tilatem den külemi lungjemer teloktep sorkar tasenba tentettsü maongka angutsüsa tang jenjang ngua lir.
Mitkartemi 2008 küm latetba linük temzüng nung bendanger ka den kibong akümer mesüra pei chirnuri bendang senso agia alir senso nem Tir menden mebendaktsütsü onük densema aliba yong Suu Kyi-i lar linük indang Tir menden mebentettsüsa tang jenjang ajurua lir.
“Ni Myanmar linük Tir mendenji asangsang nung mebenok aka, Myanmar sorkar tasenba indang lenirji ni asütsü kechiyong linük ka lenitsü asoshi Tir menden benoktsü menungdaker,” ta Suu Kyi-i nenshia ashi.
2011 nungi tenzüka democracy yimsüsütsü yimya benokba Myanmar linüki Rohingya Muslim kin den sentakba khuret densema khuret balala benoka liaka, taruba November ita agitsü ayongba election nung sentong renemba ama, ajaki shilem agiteta democracy yimya benshia electionji agitettsü ta aikati bilemtsü tenzüka lir.