Linük tenzükertem telongjem

Tanü ya Naga lima nung telongjem nüngdakba ajak rongnung linük tenzükertem telongjemsa tenüngdakba lir. Naga nunger linük tenzükertem telok balala aika küma lemsar liaka, nükjidongbo ka ser tenzüba nübortem lir. Ajisüaka, asenok ajak tia majung Naga nunger linük asoshi pei taküm aser jenjang ajak bendanga agüja tenzükertem nükjidong metongteti tanü asenok len  tom nung telok telok lemsar amonger. Aji oda, asenok tang amai lemsar aliba lenjem nung kenpika mongli telemsa tali adokli ta oda -odabo asenok tapusodang ayuba nükjidong amadoker len tom nung samatsüba tia nung lir. Iba ama tesama tia nungi asen kin aser asen lima kümzüktsü asoshi linük tenzükertem longjemer inyaktsübaji kanga tenüngdaktsü kümogo. Asenok alizüng metongaka, joko len talang jajar asünungji asenok aikati alizünga dena amadok ama kümogo. Aji oda, kar asoshi India kübok kenyongi melii Naga yimten nüchiso angutsüba alizüng, kar asoshi Naga nunger lushi ajunga yimten ka kübok longjemer India den tangatettep nung alitsüba alizüng, kar asoshi Nagaland nung alirtem asoshi yimten jenjang temaba ka bushitsüba alizüng aser ano kar alizüngbo Naga nunger alushi yimten ka kübok melongjemtetaka lokti aser sobalibaren longjema alitsüba alizüng ta telok shia alizüng balala kümogo. Tanü alima putu tasen nung Naga nungertemi ajuruba tebilemtsü tasentemji itemji asütsü. Aji oda, kin ka, telok ka aser nükjidong ka ta ser tenzükba nungi telok aika lemsaa adoknungji tebilemba aser tangatetba balala küma lemsatsübaji nisunger yimya dang lir. Atangji, asenok rongnung telemsa adokba ya asenoki tangar nem tai tongloktsütsüa akok, kechiyong asenok shingaia asenok dakbo tai mangur, ajisüaka asenoki memulungiang asenok lemsatsü makok. Aji oda, longjemtsübajia tangari masü asenoki dang asenoksasa longjemtettsü aser kodang asenok longjemdir akhi ama asenok alizüng ka dang kümadoktsü. Atangji, longjemtsü indang ya ajaki bilemer aser ajaki longjemner saka melongjemtetter ta asüba timtem ya, ashiko, telongjem tenzükdak ka menguteter asütsüa akok. Ibaji shitak süra Naga nunger telongjem tenzükdakji Aor linük tenzükertem asütsüla. Atangji, tang Aor linük tenzükertem telongjem tenüngbo tetshia angashir, ajisüaka iba telongjemji linük tenzüker telok ka nung tenzükertem telongjem danga ta reprangtetter. Ano, iba telongjem nungjia khen-khenbo mepetmesü adokba angur. Ibaji asenok ajak asoshi tejak metentettsüba mapa ka lir. Atangji, Naga nunger linük tenzükertem telok ajak ka küma tangsa tang longjemtsüla ta mashir, saka telok balala nungi adenshia tangatettep kabo yanglutettsü aser telok balala rongnung tangatettep kati arura ibaji telongjem asütsü. Iba tangatetba nung Naga nunger ajak tangatettep kati arutsü mechi nung tamasa Aor linük tenzükertem, koba telok nung lidir liaka,  ajak Aor Linük Tenzüker Telongjem ka küboki aitet nungbo Naga nunger asoshi temoatsü asütsü. Naga nunger yimten nüchiso asoshi asütsüa akok mesüra yimten yimsüsüba ka kübok külemi alitsü atema asütsüa akok mesüra tang aliba jenjang dang nungi tajungba jenjang nung alitsü asoshi temeten bushir asütsüa akok, item ajakji tarutsü Naga nunger lanurtem alitsü asoshi alima tasen tajung ka yanglutsütsü merangba mapatem lir. Ajisüaka, tanü asenok taintem asoshi tekümdangtsü kaji asenokbo lanurtem asoshi shisabolua inyaktsür saka lanurtemi asenok telok telok lemsar inyakba mapatem agi laka doker asenok aitsütsü tenzükra, asenoki ayuba alizüng matongdang asenok tsüngsü samadoktsü aser Naga nunger lanurtem agi Naga nunger memesük kümadoktsü. Iba ama tarutsü mapang nung ataloktsüba tensa tia tajung-majung ajak yimdangi arua asenoki asenok adianu medemertem den shisalemsatepa telongjem ka nung alitsü merangra, tanüngbajibo asenok asoshi Tsüngremi inyaktsütsü. Tajung nung Aorbosa Aor tama ta asüba senmang mesamadaktsüi tanüa Aor linük tenzükertem rongnunga inyakdaktsüner.