Linük tesem aika nung Congress-i CBI office kima longkak ait

New Delhi, Mongputeni/October 26, 2018: Tanü New Delhi nung CBI headquarters anasa Congress Party Tir, Rahul Gandhi-i Rafale fighter aircraft ka amer CBI Director, Alok Verma nem pa menden tanaben agutsütsü akhangba noksa nung angur. 

New Delhi, Mongputeni/October 26 (Agencies): Tanü Congress Party nung inyakertem aser lenirtemi linük tesem aika nung CBI office kima longkak aitogo, ajisüaka linük yimtiba, New Delhi nungang CBI headquarters kima mepetmesü tulu adoka liasü.
New Delhi nung Congress party Tir, Rahul Gandhi leniba nung longkak ait.
Centre sorkari democratic rejutem raksatsür ta longkak aitba mapang nung Rahul den lenir aika apu.
Sorkari CBI Director, Alok Verma nem leave agutsütsü telemtetba agiba anema Congress-i longkak ait.
Congress-i ashiba agi, Verma-i Rafale deal dak sendakba kulitem bushiba ajanga sorkari pa agien.
CBI-i, Verma ji tang tashi CBI tongti, aser khenpiga atema dang agien, ta shiaka Congress-i pa nem tanaben pa menden agutsütsü takhangba agutsüogo.
Congress nung inyakertemi CBI headquarters kima atsü raksatsütsü merang aser BJP den Centre sorkar anema yimyim ayima liasü.
Parnokisa Ato kilonseri aniba Appointments Committee anema longkak aita Rahul Gandhi-i, Ato kilonser Modi-i democratic rejutem raksatsür, ta aitsü.
Tesülen pa den Congress lenirtem aika pua Lodhi Road Police Station-i anir ao, ajisüaka khen dang lirbo chiok.
Delhi Traffic Police-i ashiba agi, tanü Congress-i longkak aitba sentong ayongzüka party nung inyakertem aika adenshiba ajanga Lodhi Road, CGO Complex, Bhishma Pitamah Marg, Sai Baba Chowk aser Dayal Singh College lenmangtem nung gari senzüsembongba kongshia liasü.
Ano Lucknow, Bengaluru aser Patna nunga CBI headquarters anasa longkak ait aser Chandigarh nungbo Congress nung inyakertem dak tzü khalokja liasü.
Tamalen BJP-i, Verma nem leave agutsübaji CBI akhümket wazüka ayutsü atema lir, ta metetdakja liasü.
Union Home Minister, Rajnath Singh-i, “Congress asoshi nüburtem dak sendakba onüktem atema ola adoktsüsa mali, ibayongji nüngdak makaba onüktem nung parnoki ola adoker. Onoki bushisüngdangba report atatsü,” ta metetdaktsü.