Linük tesem ajaklen truck kiburtem lungkak ait

New Delhi, October 02 (Agencies): Brihostibar nü nungi tenzüka All India Motor Transport Congress (AIMTC)-i ayonga truck lakh aika mesenzüi lungkak aitba ajanga linük tesem aika nung timtem agi kongshiogo.

Ajisüaka truck nung mamatzü, aonsotsü aser nüngdakba mozütem abenbabo menokdanger.

AIMTC-i saru anema lungkak aiter. Parnoki ashiba agi, saru saruba tesemji ochimashi aser sen rakzükraktemba tesem ka kümogo, iba den külemi nüngdak makaba nung gari senzütsü menodaktsür, koba ajanga mapang aser totzü amajok nung lalur.

Linük nung truck kiburtem tentet tulutiba-isa saru khen nungdang agütsütsü akhanger.

Osangbenertem den jembidang shishilembartemi, lungkak aitba ajanga shishilembartem, truck kiburtem aser sorkar densema ajaki sen crore noklang aika nung takoksa ajurur, ta ashi.

“Iba lungkak aitba ajanga anogoshia truck anishirtem sen crore 1,500 takoksa ajurua alitsü aser sorkar sen crore 10,000 takoksa ajurua alitsü,” ta AIMTC Tir, Bhim Wadhwa-i ashi.

AIMTC nung truck kibur lakh 87 aser bus o tempo kibur lakh 20 shi lir.

Ajisüaka truck tentetsa, All India Transport Welfare Association (AITWA) bo lungkak aitba nung maden.

Sorkari December ita tashi nung e-toll (electronic toll) tenzüktsü ta ashi, ajisüaka truck kiburtemi ibaji magizüki AIMTC aser Union transport ministry na tsüngda telemtetba tajung ka dangi marui lir.

Yashi Telangana aser Andhra Pradesh na nung truck lakh 16 mesenzüi liasü.

Iba dak alia Punjab, Haryana, Himachal Pradesh, Delhi, Uttar Pradesh aser Odisha state tem nunga truck mesenzü. Ajisüaka West Bengal nungbo truck kiburtem tentet tulutibai lungkak aitba nung shilema magii liasü.

Federation of West Bengal Truck Operators Association general secretary, Subhas Chandra Bose-i, “Item takhangba onüktem onoki pusemer. Onoki iba lungkak aitba manemer, ajisüaka iba lungkak aitba nungbo shilem magir,” ta ashi.