Linük tesem ajaklen yi nokdangdaktsüner: Praveen Togadia

Patna, September 04 (Agencies): Bihar Chief Minister, Nitish Kumar-i Bihar nung yi takok ngua nokdangtetba atema tenüngsang agüja tanü VHP International Working President,  Praveen Togadia-i, linük tesem ajaklen yi nokdangdaktsüner, ta ashi.
Deobarnü Patna nung osangbenertem den jembidang Tagodia-i, “Bihar tesem ajaklen Nitish Kumar-i yi khenyongi nokdangba atema ni pa nem tenüngsang agütsür,” ta ashi.
Iba mera agiba ajanga nüburtem aser kibongtem nung tebilemtsü madoktsü, kechiyong yi ajemba nung indokba sen crore aikaji nüngdak balala nung amshitettsü, ta paisa ashi.
Tanga state temia yi nokdangtsüla ta mepishia pai, Vishwa Hindu Parishad (VHP) indang ‘India Health line’ mapatong kübok doctor temi linük tesem ajungalen de-addiction campaign tenzükogo, ta metetdaktsü.
De-addiction campaign ji state aikati junga agizükogo aser, iba ya ajanga kenü anogobo linük tesem ajunga nung yi malitsü imlar, ta paisa ashi.
Taküm April ita nung Nitish Kumar-i aniba sorkari Bihar tesem ajunga nung yi khenyongi nokdanga yi ajemtsü, ayoktsü aser yanglutsü memelar.