Linük tesem ajaklen yi nokdangtsü sentong mali: Sorkar

New Delhi, August 02 (Agencies): Peipei state nung yi nokdangba maparen nung Centre sorkari yariteptsü akok, ajisüaka tang tashi nungbo linük tesem ajak nung yi nokdangtsü sentong mali, ta sorkari tanü Lok Sabha nung metetdaktsü.
Senden nung tasüngdangba ka langzüdang Minister of State for Home, Hansraj Gangaram Ahir-i, 2012-14 küm yi tamajung ajemba ajanga nisung 2927 süogo. Item rongnung 2012 küm nisung 731 asü, 2013 küm nisung 497 asü aser 2014 küm nisung  1699 asü, ta metetdaktsü.
Paisa, state temi yi nokdangba maparen nung Centre sorkari yariteptsü akok, ajisüaka tang tashi nungbo linük jenjang nung yi nokdangtsü sentong mali, ta ashi.
Ahir-i ashiba agi, Excise Act küm 2014 küm yi litre crore 2.83 puogo.
Taküm June ita tashi nung ozüng benokba agency balalai amphetamine seret 366.35, cocaine seret 6.51, ephedrine seret 44,811.82, ganja seret 38,418.89, hashish seret 1,144.12, heroin seret 351.12, ketamine seret 16.57, opium seret 663.15, aketmozü-phensidyle pongdang 205150, poppy husk seret 12,903.41, poppy straw seret 34,018.34 aser pseudo-ephedrine seret 43.74 puogo, ta minister-isa metetdaktsü.