Linük tesem ajungalen NRC menüngdak: Bihar CM Nitish Kumar

Patna, January 13 (Agencies): Hombarnü Bihar Chief Minister, Nitish Kumar-i, linük tesem ajungalen National Register of Citizens (NRC) benoka inyaktsü menüngdak, aser ibaji tim masü, ta metetdaktsü.
SCs aser STs nem ano küm ter menden shiteta yutsütsü atema amendment agizükba asoshi state assembly nung züngsemtem dang pelaba lemsatepba mapang nung Chief Minister-i, linük tesem ajungalen NRC mapatong benoktsü menüngdak, ta ashi.
Opposition Lenir, Tejashwi Yadav-i, BJP den teloktep nung dena alisang Chief Minister-i Citizenship (Amendment) Act, NRC aser National Population Register (NPR) onüktem nung pa tangatetba metetdaktsütsüla, ta akhangba sülen ibaji langzüdang Nitish Kumar-i, NRC ji kechi nungi pokteter? ta asüngdang.
“Item onük (CAA, NRC aser NPR) ajanga linük petsapronger. Rajiv Gandhi-i aniba sorkar mapang sign asüba accord dak sendakba nung NRC ya Assam atema dang liasü ta asenoki temelung nung züngoka ayutsüla,” ta Kumar-i ashi.
“NRC ji mataloktsü ta onoki bilemer. Ni amanger, Ato kilonseria iba onük nung tejangja jembiogo,” ta paisa shisem.