Linük tesem balala nungi ISIS pusemer 13 puogo

New Delhi, January 22 (Agencies): Tanü NIA, state police aser Central agency temi, linük tesem balala nung kiralongrar telok ISIS pusemer 13 apuba ajanga linük nung lendong tulu agütsütsü aliba nokdangtetogo, ta ashi.

State pezü- Karnataka, Hyderabad, Maharashtra aser Uttar Pradesh state tem nung nisung 13 jagi kiralongrar telok ka tenüng agi, ‘Janood-ul-Khalifa-e-Hind’ tenteter liasü, aser iba telok tangatetbaji ISIS den kasa liasü.

Mumbai yimti nung alir nisung ka tenüng agi Munabeer Mushtaq ji iba tentet nung ‘Ameer’ liasü aser iba telok jagi linük nung tongtibang tesemtem nung lendong agütsütsü sentong liasü, iba den külemi bendangertema kar amaktsü sentong liasü, ta Home Ministry osang ka ajanga ashi.

NIA aser security agency temi state ajak nungji police teyari agia kiralongrartemi mita oa liasü.

Tang pua alirtem dang asüngdangyatsü aser bushisüngdangtsü asoshi parnok ajak linük yimtiba, Delhi-i anir aruogo. Mezüng bushisüngdang ajanga iba kiralongrar telok tasenbaji kanga junga acha ayanga tentetba telok ka liasü bushitetogo.

NIA aser Central agency züngsemtemisa iba telok nung tongti, Ameer ket nungi mobile phone 8 densema mobile phone ajak agi 42 puogo. Par telok jagi bendanglen nungi senotsü teyaria agia liasü ta kasa osang ajanga ashi.

NIA aser agency temisa parnok ket nungi tapoktsü osettem, detonators, wires, batteries aser hydrogen peroxide den Jihadi tezüluba shidi-a kar ngutetogo.