Linük toktsür maotsü; ni jembiba nungi matsüngshir: Aamir

Mumbai, November 25 (Agencies): Bollywood actor, Aamir Khan-i linük nung akhümtsübutep maliba onük jembiba o aikati aitsüba sülen tanü pai, pa mesüra pa kinüngtsü Kiran Rao nati linük toktsür aotsü tebilemba mali, aser pai jembiba o nungi pa matsüngshir, ta shiogo.

Arishi küm 50 Aamir-i, tawa linük tensa apir linük nung akhümtsübutep mali ta jembiba sülen BJP aser film industry nungi kari pa aija liasü, iba sülen tanü pai, India nunger ka ama pa nüma atanger, ta ashi.

“Tamasa ni iba ya ashir, ni mesüra kü kinüngtsü Kiran na linük toktsür aotsü tebilemba mali. Künati kodanga yamaji mebilem aser tarutsü nunga yamaji masütsü,” ta Aamir-i tanü jangjatsüogo.

“Kari danga ibaji nunga, ta bilemra paroki kü interview mengudang mesüra ni jembiba o metetsümonga tai ratettsütsü meranger. India ya kü linük, Ni iba linük meimer, yangi asoba atema ni tia kaa bilemer, aser yangi ni alitsü,” ta pai ashi.

Hombar nü Delhi nung sentong ka aliba mapang actor Aamir-i, tan linük tensa apir pa kinüngtsü Kiran-i chirnurtem atema tsübua bilemer, ta jembiba sülen yimtenren nung iba o ji ashishitep tenzükogo.

Aamir-i, “Kiran küna takum piyong India nung liogo. Tang mezüngsüa lai lar tanur atema tsübutsür, lai tan tensa atema tsübur,” ta jembia liasü.

Taitsüba o tesem aikalen nungi liaka tanü Aamir-i sangdong ka ajanga pai tamalen jembiba o nungi matsüngshir, ta shiogo.

“Ni interview agiba mapang nung jembiba ajunga nungi ni matsüngshir. Ni linük anemer ka ta jembir ajak dang ni ya ashir, Ni India nunger ka ta nüma atanger, iba atemaji ni shinga dang nungi temelaba menüngdaker mesüra ni pusemtsü menüngdaker,” ta Aamir-i ashi.

Aamir-i jembiba o aija BJP-i, “India dak alia pa aser par kibong koleni aotsü (?) India ama linük tajungba mali aser India nunger Muslim atema Hindu dang nungi tajungba kidanger mali. Muslim linüktem aser Europe nung tensa koma lir (?) Ajaklen akhümtsübutep mali,” ta shiogo.

Aamir-isa, “Ni bilemba jembiba anema asaloktsür ajak dang ya ashir, ibaji ajanga nenoki kü onük nung kuli tajung agütsür dang,” ta ashi.

Paisa, “Ni nungita noktaker ajak dang kanga pelar. Asenoki iba linük balaka aser tepor ajung ya wazüka ayutsüla,” ta ashi.