Linük ya ‘Hindi, Hindu aser Hindustan’ kijabo masü: Shashi Tharoor

New Delhi, March 21 (Agencies): JNU mangatettep ken o dak sentakba nung BJP aitsüba olen ka nung Congress lenir aser MP, Shashi Tharoor-i, joko tangbo linük meimbaji nisung kati ‘Bharat Mata Ki Jai’ ta ashiba mesüra mashiba ajanga bendanger, ta aitsü.

Tharoor-i, nisung kati pei tangatetba nung shimtsüji temeten agütsütsüla, ta ashi.

“Tanübo linük meimbaji nisung kati ‘Bharat Mata Ki Jai’ ta ashiba mesüra mashiba ajanga lemteter. Nibo ibaji pelaa ashir, ajisüaka ibaji ajaki ashitsüla ta ni ajak rongshitsü makok,” ta Congress leniri ashi.

Deobar aonung JNU nung kaketshirtem den jembidang Tharoor-i, “Asen linük Temzüng ajanga ibaji mashitsü temeten agütsür aser ashitsüa temeten agütsür. Ni kodang ibaji shinüra ashitsü, aser ibaji democracy lir,” ta ashi.

Asen linük ya ‘Hindi, Hindu aser Hindustan’ kijabo masü ta shia Tharoor-i, India nung lokti telemsa aser temeyoktep aika aliba ya nisung ajaki agizüktettsüla, kechiyong ibaji linük puti otsü sobaliba lir, ta ashi.

“India ya Hindi, Hindu aser Hindustan kija masü. India nung onoki Krishna aser Kanhaiya Kumar naprong aginer. Onoki iba linük tesem ajaklen nungi India nüburtem ajakji tarutsü nung tia kasa südaktsüner,” ta pai ashi.

“India civilisation ajanga tamangba yimsü aser tangatetba balala melar ta ajaki angatettsüla,” ta paisa ashi.

JNU administrative hall kima kaketshirtem den ‘JNU and Nationalism’ onük nung jembidang Tharoor-i, “Nenok yagi shisaliok atema aru asütsüa akok, saka nenoki linük nem-a shisaliok agütsür. Yangi atalokbatem ajanga nenoki tongtibang onüktem- melung masürtem ola aser democracy, linük anemba aser nüjiso nung linük nüburtem nem shisaliok agütsür,” ta ashi.

Tharoor-i minute 40 jungnüa jembiba piyong pai puti otsütem, pai ajangshibatem indang nung jembiba den külemi Jawaharlal Nehru aser Everlyn Beatrice Hall nungeri jembiba shin oa jembia liasü.