Linük yangerba nung media-i shilem agitsüla: Acharya

July 1, 2019 nü Mangaluru nung District Working Journalists’ Association-i ayongzükba Dakshina Kannada District Journalists’ Meet tenzükja Nagaland Angh aser Manipur Angh repsema inyaksang, PB Acharya-i milen tsükloktsüba noksa nung angur.

Mangaluru(Karnataka), Chiteni/July 03 (TYO): Nagaland Angh aser Manipur Angh repsema inyaksang, PB Acharya-i osangbenertem dang lokti nung maongka junga manguba nüburtem terenlok atema rangloker inyakba ajanga linük yangerba nung shilem agitsü ayongzük.
July 1, 2019 nü Karnataka state kübok Mangaluru nung District Working Journalists’ Association-i ayongzükba Dakshina Kannada District Journalists’ Meet tetenzük sentong nung jembidang Nagaland Angh, Acharya-i, lokti nung media ya tongtibang shilem ka lir, anungji linük tashi taitba akümtsü atema osangbenertemi nüburtem ajungmesotsüla, ta ashi.
Paisa osangbenertem dang nüburtem aoksatsüsa tatalokbatem osang mesangdongtsüla ta ashi.
Iba sentong lenir media mongin, Ishwara Daithota-i, linük nung nüburtem nem temeden agütsüba sülen India nunger media kanga melenshiogo, ta ashi.
Okila jembidang Dakshina Kannada District Working Journalists’ Association Tir, Srinivas Nayak Indaje-i, yimtsüngtem nung aliba nüburtem taküm jenjang aser timtem balala angatettsü atema association-i district nung aliba yimtsüngtem sema senzütsü atema sentong yangluogo, ta metetdaktsü.
Kasa sentong nung souvenir ‘Samachara’ saya aser Mangaluru Special Economic Zone-i Kutlur, Belthangady nung aliba Government Higher Primary School nem computer tenla agütsü. Iba dak alia kaket, photographs, paintings aser cartoons indang exhibition agia liasü.
Iba sentong nung Mangaluru South MLA, D Vedavyas Kamath, Mangaluru North MLA, Dr Y Bharat Shetty, Superintendent of Police, B M Laxmi Prasad, Mangaluru Press Club Tir, Annu Mangaluru aser Patrika Bhavan Trust Tir, Anand Shetty nungera aden.