Linük yimtiba, Delhi nung nashi tepsetba menokdanger

New Delhi, November 06 (Agencies): National Capital Region (NCR) nung nashi tepsetba nokdangtsü aser nashi shi aser item products nokdangtsü atema temepishiba ka benoka liasü ajisüaka Hokolbar nü Delhi High Court-i ibaji magizük.
Chief Justice G Rohini aser Justice Jayant Nath nati akumba bench-i, iba temepishibaji tangatetba tai lir, ta ashi.
Delhi nung AAP sorkari High Court dang, nashi kümzüktsü atema ‘Delhi Agricultural Cattle Preservation Act’ lir ta nenshia metetdaktsüba sülen High Court-i nashi tepsetba nokdangtsü temepishibaji magizük.
Iba temepishibaji monk kati agüja liasü, aser pai Delhi sorkari dang Jammu & Kashmir nung benshiba ama 1932 Ranbir Penal Code law benoktsü mepishi. Iba ozüng nung nashi aser nashi mesükba shirurutem tepsetba atema küm 10 tashia tepouktak ayutsü aser senchi-a achitsü lateta lir.
Petitioner, Swami Satyananda Chakradhari-isa, HP High Court-i Centre sorkar dang nashi kümzüktsü atema special schemes benoktsüla aser nashi tejenoktak ki aser chiyungtsü atema state sorkar nem senotsü agüjang ta shiogo, ta metetdaktsü.