Linük yimyim tasenbaji ‘Congress Free India’ lir: Madhav

New Delhi, June 10 (Agencies): Tanü BJP National general secretary, Ram Madhav-i, tawa assembly election nung Congress yimtenren tamakok ngudaktsüogo, aser iba ya ajanga tang linük yimyim tasenbaji “India nung Congress samatsütsü lir’ ta kuli sayur, ta metetdaktsü.

New Delhi nung sentong ka nung jembidang Madhev-i, “Tawa agiba Assembly elections nung BJP-i junga inyakogo. Tang mezüng party-i Assam nung sorkar kümogo, aser West Bengal nunga junga inyakogo. Ajisüaka asen linük nüburtemi obendang tajung ka agütsüogo,” ta ashi.

“Iba obendangji, Congress sentokba lir. Lok Sabha election matongdang Modi (Narendra)-i India nung Congress samatsütsü tayongzükba agütsü. Tangbo iba ya linük atema yimyim ama kümogo,” ta pai ashi.

“Congress nung tang aliba lenirtem ali tashi nungbo parnoki election nung tamakok angutsü. Ajisüaka India nung Congress samatsütsü shitakba tetezüji Congress yimteren tangatetba tamakok ngudaktsütsü lir, kong ochimashi, inyakyim majungba, aser kibong ka nungi yimsüsüba lir,” ta pai ashi.

West Bengal nung Congress den loktepba party, CPI(M)-a aija BJP leniri, “Congress den loktepertemia tamakok nguogo,” ta ashi.

Trinamool Congress dang tekümdangtsü o ka metetdakja Mahdev-i, “Kechiba yimtenren nung iba ama rara adoker (?) Nenok yimtenren nung lira yimtenren ajanga onok den toktepang. TMC-i Congress sobaliba benshira kobi melii Congress maliba India yimyim agi TMC maliba India ta yimyim melentsü,” ta ashi.