Linüki küm 70 tashi Modi ama lenir ataogo: Amit Shah

Ahmedabad, March 30 (Agencies): Tanü BJP Tir, Amit Shah-i, election sülen shibai linük anitsü, iba nungji ajemdaker 2019 Lok Sabha elections agitsü, ta metetdaktsü.
Tanü Ahmedabad nung Gandhinagar Lok Sabha menden nungi tokteptsü atema Shah-i nomination file asütsü lia pai, küm 70 tashi linük nüburtemi Narendra Modi ama Ato kilonser ataogo, ta ashi.
Tanü iba sentong nung Union ministers- Rajnath Singh aser Nitin Gadkari na den NDA teloktep nungi lenirtem Shiv Sena tongti, Uddhav Thackeray, SAD tongti, Parkash Singh Badal aser LJP tentetsang, Ram Vilas Paswan nunger densema liasü.
“Ni linük tesem balala semdangba mapang nung linük nüburtemi linük anidaktsütsü atema Modi tenüng ayimten,” ta pai ashi.
“Shibai linük anitsü?, iba nungji ajemdaker taruba election raratsü. Himachal nungi Kanyakumari tashi aser Kamrup nungi Gandhinagar tashi ni nüburtem dang asüngdangba mapang nung ni ola ka dang angashi- ‘Modi, Modi, Modi'” ta pai ashi.
Gandhinagar menden nungi nomination file asütsü maongka anguba ya pa atema tia taka, ta pai ashi. Taoba mapang iba menden nung BJP lenir tain, L K Advani, taoba mapang Ato kilonser, A B Vajpayee aser Purshottam Ganesh Mavlankar nungeri toktepa aruogo.
BJP Tir, Shah-i tang mezüng Lok Sabha election nung Gandhinagar constituency nungi tokteptsü. 1998 küm nungi LK Advani-i iba menden nung toktepa takok ngua aruogo.
Gujarat state BJP-i, Shah-i nomination file asüba ajanga state party nung inyakertem ajungmesotsü aser Lok Sabha menden 26 prongla nung takok angutsü, ta shiogo.