Linüki Mahatma Gandhi bilemteta akhüm agütsü

New Delhi,  January 30, 2016: Honibarnü New Delhi, Rajghat nung Mahatma Gandhi sür küm 68 ajungba anogomung nung asür bilemteta Ato kilonser Narendra Modi-i Mahatma Gandhi memorial nung Gandhi nem akhüm agütsüba noksa nung angur.

New Delhi, January 30 (Agencies): Tanü Honibarnü linüki Mahatma Gandhi sür küm 68 ajungba anogomung nung asür bilemteta Tir, Pranab Mukherjee aser Ato kilonser, Narendra Modi nati anir linüki linük tebu nem akhüm agütsüogo.
Tanü New Delhi, Rajghat nung aliba Gandhi memorial nung Mukherjee, tatong Tir Hamid Ansari aser Modi nungeri naro tokja akhüm agütsü.
Rajghat nung Gandhi nem akhüm agütsür rongnung Defence Minister Manohar Parrikar, Urban Development minister, M Venkaiah Naidu, Congress Tir Sonia Gandhi, Rajya Sabha nung opposition lenir Ghulam Nabi Azad aser taoba Delhi Chief Minister Shiela Dikshit nungera densema liasü.
Akhüm agütsüba sülen Sonia Gandhi aser Dikshit nabo kidangi meyipa ao saka tongtibang nisung aika arua akhüm agütsü piyong Azad bo liasü. Tanü taoba Ato kilonser Manmohan Singh-ia Gandhi memorial semdangogo.
Mahatma asüba anogomung nung asür bilemteta Modi-i twitter ajanga, “Teti meima aliba aliba Tebu nem pa asüba anogomung nung akhüm agutsür,” ta ashi.
Linük tebu Gandhi ya 1948 küm iba anogo nung iba tesem nung kahset.
Ato kilonser Modi-isa linük atema taküm tenla agüja asürtem ajak nem akhüm agüja twitter ajanga, “Linük atema taküm tenla agütsür tasutaitertem ajak bilemteter. Parnok taküm tenla asen melung nung teti lir,” ta ashi.
Modi-isa, “Linük ka ama asenoki taküm bendanga agütsürtem bilemteta tanü 11:00 ako nungi minute ana süjema nokdakdi,” ta mepishi.
Tanü Gandhi nem akhüm agütsür rongnung BJP lenir tain L K Advani, Union Minister tem- Mahesh Sharma, Bahul Supriyo aser Rao Inderjit Singh. Sepai tongti asem- General Dalbir Singh, Air Chief Marshal Arup Raha aser Admiral Robin Dhowan nungera dena liasü.