Linüktemi refugee tem jenokdaktsübaji jangratemtsüka: Dalai Lama

Dharamsala (Himachal Pradesh), September 19 (Agencies): Tibetan yimsü lenir, Dalai Lama-i, pei linük nung rara adokba ajanga linük toktsür aoer refugee tem nem linük aikati tejenokdak agütsütsü mulungtetbaji jangratemtsüka lir, ta ashi.
Nobel Peace Award angusang Dalai Lama-i tanü pa indang official website sangdong ajanga, “Linük aikati refugee tem nem tejenokdak agütsütsü melungtetbaji jangratemtsüka, ajisüaka parnoki toktsür aruba linüktem nung rara atema asenoki tarutsü nung yimjung atema lenmang bushitsüla,” ta ashi.
Yashi Cambridge nung osangbener kati asüngdangba langzüdang Lama-i, “Yimjung atema asenoki meranga inyaktsüla,” ta ashi.
Tamangba yimsü tenüng nung rarabaji tim asü (?) ta asüngdangba langzüdang Lamai-i, “yamaji kodanga masü,” ta ashi.
Rara adokbaji tim asü ta asüngdangba langzüdang Dalai Lama-i, “Ibaji langzütsü tasak. Second World War nung Nazi Party tamakok ngudaktsüba tu tajangzük liasü aser Korean War ajanga South Korea kümzük, ajisüaka Vietnam War-a kasaji (tajangzük liasü) ta ashitsübo tasak,” ta shi.
1959 küm Dalai Lama par linük nungi ajenba mapang nungi tenzüka pa India nung jenoka alir. Tibet yimsüsüba atsüngdokba sülen nungi tenzüka iba yimsüsüba ya Himachal Pradesh kübok tenem aliba jila, Dharamsala nung amenoka lir.