Buenos Aires, January 11 (Agencies): Kiojen aser osettsüset raksatsürtemi Mongulbarnü, Buenos Aires nung Argentina nunger football asayar mongin indang kürakyanglu raksatsüba agi ponguben Ballon d’Or akoksang indang kürakyanglu nung temang tesatang ka maket lir.
“Lionel Messi indang kürakyanglu raksatsüba ajanga temang temalen mali,” ta Buenos Aires yimti nung ketdangser kati metetdakja liasü.
Iba kürakyanglu ya marble sentsü tanak nung jiteta yanglu aser yaküm June ita Copa America final nung Argentina-i Chile makokba sülen iba kürakyanglu ya mesoa liasü.
Arishi küm 29 tain Messi iba asaya nung tamakok aluba sülen international football asaya nungi anentsü shia liasü, saka pa kobi melie tanaben meyipa arua asayatsü molungtet.
Iba sülen nungi Argentina nunger football sapurtem den Messi tesendaktep mejungi arudaki, aser aikati pai Barcelona nung junga asayaba ama par linük nem masayatsür, ta nemjema bilemba lemsatepogo.
Iba tesem nung tamalena taoba US Open Champion, Gabriela Sabatini indang kürakyanglu nung bena aliba racquet agizüka intoktsür liasü.
Buenos Aires “Walk of Fame” nung ya Messi, nüngtugu basketball asayar Manu Ginobili, Grand Slam pezüben abener Guillermo Vilas aser Formula One nung nüngtugu Juan Manuel Fangio nunger indang kürakyanglutem yanglua lir.
You must be logged in to post a comment Login