Lionel Richie-i ‘Hello From Las Vegas’ sayatsü

Aami/June 03, 2019 (Agencies): America nunger kentener Lionel Richie-i pa indang live album – ‘Hello From Las Vegas’ taküm küm August 23, 2019 nü sayatsü ternemba lir. Lionel indang live album ya Sin City (Las Vegas) yimti kübok Zappos Theatre, Planet Hollywood Resort & Casino nung record süa liasü.
Iba live album ajanga Lionel küm 50 tashi musician ka ama shilem agia aruba indang fans tem dang ashitsü. Tejangrartemi, iba live album jela mekaa yutettsü.
Arishi küm 69 tain kentener Lionel indang kensep tasenba nung solo ken – ‘All Night Long’, ‘Hello’ aser ‘Dancing On The Ceiling’ densema The Commodores telok den külemi atenba kentem talisa ‘Three Times A Lady’ aser ‘Easy’ desnema lir.
Iba LP (Long Play) nungsa 1985 küm sayaba charity single ‘We Are the World’ ken densema lir, koba musical telok ‘USA For Africa’ atema Lionel-i asür Michael Jackson den külemi zülua liasü.
Tang Lionel indang taruba North American tour, koba May 28 nü Sugar Land, Texas kübok Smart Financial Centre nung tenzüka liasü, iba tour sülen taküm tsüklawa mongpu mapang Lionel UK-i aotsü ternemba lir.
UK tour nung Lionel den külemi ‘Isn’t She Lovely’ ken atensang Stevie Wonder-i tetushi tesemdanger ama July 6, 2019 nü London indang Hyde Park nung British Summer Time sentong nung shilem agiba angutsü.
Tawa, Lionel-i ashiba agi, The Commodores telok den melongjemdang, ni Episcopal priest ka akümtsü asoshi bilema liasü.
”University-i aotsü atema ni kütsü aser kübo toktsür ao aser idangji ni Commodores telok den ajurutep. Iba mapang kü mulung ajak agi Arogo tenzüker ka akümtsü asoshi bilema liasü,” ta Lionel-i ashi.