Lion’s Club Longsa küm 75 jungogo

Longsa, Jan 11 (TYO): Lion’s Club Longsa tenzüker küm neter pungu (75) ajungba platinum jubilee sentong Longsa yimdak “Lanu Putu Terenlok” omen nung ajemdaker longsotepa mungogo. Ao lima nung iba club ya tejentiba rongnung ka asütsü.
Sentong nung tetushi tesemdanger MLA & Advisor to CM Merentoshi R Jamiri jembidang, jubilee tetezüji taoba lenirtemi koba mapa tajung inyakogo parnok nem tenüngsang agütsüba den taoba mapang tashi mait kar danga inyaksema lira itemji metongshia aser taitoktepa tarutsü putu asoshi nükla tajung yur aotsüla, ta ashi.
Telungjem lira terenlokji arutsü, anungji, taoba mapang koda lungjema aru yamaji ano telungjemji tali akangshia Tsüngrem dak rangloker aotsü asoshi, ta paisa ayongzüka liasü.
Kentenmenü aser saisapong tsütsü dang masü saka akhi arju nung sobaliba kechisarena angazükba medem tanüa tensa den apet club balalai pei sobaliba aser oshioben kümzüka ayutsü asoshi temulung agütsütsü paisa ajungshia liasü. “Sobaliba memetetra asen nükmen samadoktsü”, ta paisa tekümdangtsü o ka shisem.
Yimdak yimtsüng nung züngdor mapa meinyaki kazür lanur aika lir, ibaji parnok kija khuret ka dang masü saka lokti khuret ka küma odaki, anungji, item nüburtemji anitena lenmang tajung sayutsü nüngdaker, ta paisa tebilemba ka lemsatep.
Tetushi tesemdanger Merentoshi R Jamirisa Lion’s Club Longsa jubilee nüngtem adokba nüngo kaket ka sayatsü.
Tongti o jembir taoba MLA Süpongmereni jembidang, tang asenok koba jenjang nung lir, ibaji asen tsüraburtemi meranga inyakba temoatsü lir, ta tenüngsanga ashi.
Achiajemba azüokba den azümesenba indoker asen litsü nung kechi peria adoker, itemji züsenteta mapa meranga inyaker pei tepok sünga alitsü asoshi paisa lanurtem dang inyakdaktsünüba o ka ashi.
Paisa alima tzü mopung wazüka ayutsü asoshi olen ka shisemdang, ozüsangnu aser shiruru balala tepseta machitsü asoshi tayongzükba ka agütsü.
Lion’s Club Longsa tir L Lanutoshii tarurtem ajak pela agizük. Longsa Village Council Chairman Pongenmeren, Rongsenmongba Tatar, Aolepden (ex.MLA) parnoki tepela o lemsatep. Taoba Nagaland Addl. Dev. Commissioner Dr. Temsüwatii tajungshi o tulu bener arua telok ayongzük. Jubilee planning committee tayonger Bendangtoshi ajanga melepzüng o jembi. Sangpu Lemtuongerna yimsüsürtemi sobaliba ken ka den ano telok kari sentong lemsadakja ken ajanga shilem agia liasü.