Lipstick Under My Burkha-i Glasgow Film Fest nung Award angu

Glasgow, February 28 (Agencies): India nunger film yanglur Alankrita Shrivastava indang film ‘Lipstick Under My Burkha’ koba linük nung censor board-i film sayutsü asoshi certificate magütsü, iba film-i Glasgow Film Festival 2017 nung Audience Award nguogo. Iba tetushi ya kanga dang mapang shitak ka nung nguogo, ta director-i ashi.
Scottish actor David Tennant-i Shrivastava nem award agütsü. Award tem benjung nung sentepa aliba nübortemi Hombarnü shim.
Prakash Jha-i produce asüba iba film nung Konkona Sen Sharma aser Ratna Pathak Shah nungertem shilem agir.
Central Board of Film Certification (CBFC)-i February 23 nü iba film nem certificate agütsütsü asoshi nungnang. Film nung o tamajung jembiba aser nüktangpangta dak sendakba tem inkosema yangluloka aliba kulitem ajanga certificate magütsü.
“Lipstick Under My Burkha-i Glasgow Film Festival nung ScotRail Audience Award anguba atema ni kanga pelar. Film tetsür dak tali rangloker yangluba ajanga India nung sayutsü asoshi certificate magütsüi aliba mapang ka nung iba award anguba ya kanga dang mapang tajung ka lir,” ta Shrivastava-i ashi.
“Glasgow nung aliba nüburtemi iba film saklokba ajanga alima tesem aser sobaliba balala dena iba film apetba jangjatsür. Maneni iba ajanga tetsürtem indang otsü parnok tsütsü nungi ashitsü nüngdakba tali jangjatsür. Iba award ajanga kü nem timla agütsür aser tali tasü itshedaktsür. Iba ajanga ano tetsür ola nokdangtsü merangertem mangai pei otsü maneni ashitsü asoshi, tetsür ka ama kü nem tali amangdaktsür,” t alai shisem.
CBFC-i iba telemtetba agiba sülen nungtugu nisung Pooja Bhatt, Farhan Akhtar aser Vivek Agnihotri nungertemi aitsüogo.