Lipstick Under My Burkha sayatsü asoshi temelaba nguogo

New Delhi, June 6 (Agencies): Lipstick Under My Burkha director Alankrita Shrivastava-i ashiba agi, Ekta Kapoor Alt Entertainment-i iba movie present süa lemshitsüba atema kanga pelaa bilemer. Iba film ya nübur aika dang sayutsü tetemsü, ta lai shisem.
“Ekta Kapoor Alt Entertainment-i ‘Lipstick Under My Burkha’ film present süa lemshitsüba aliba maparen ya kanga jangratema pelaa bilemer. Iba film ajungketsüba ya kanga jangratemtsüka asütsü. Iba film ajanga nübur aika tongtettsü ta imlar,” ta Shrivastava-i ashi.
‘Lipstick Under My Burkha’ ya alima ajunga nung film festival aika nung shilem agia takok nguogo, saka linük nung censor board den mangatettep aliba ajanga mesayateti lir. Parnoki certificate magütsüba kuliji, iba film ya tetsürtem dak tali rangloker yangluba film ka lir aser aji dang masü film nung tiem masüba o jembiba aser shi nung medemba shilemtem kar tem aliba ajanga sayatsü asoshi temelaba magütsü.
Mapang talangka iba dak sendakba nung censor board den mangatettep adoka arur tawa taoba hopta ‘Film Certification Appellate Tribunal’s’ ajanga tetuyuba agütsüba nung ajemdaker iba film nem certificate agütsüogo.
“Onoki iba film theatre tem nung ozüng meraksai sayatettsü asoshi raraa aruogo. Iba film ya tajungtiba nung sayatsü langa lir,” ta Shrivastava-isa ashi
“Tetsüri yangluba tetsürtem indang film yanglua reprangtsüla. ‘Lipstick Under My Burkha’ film India nung sayaba ya India nung tetsürtem ajak atema pelatepba mapang ka asütsü. Kechiba tetsürtem indang miim maparentem, temeim amala otsütem yanglua mesayatsü? Asenoki asenok temeden khanga tetsürtem dak ajemdaker yangluba film reprangti,” ta lai maneni shisem.
Iba film ya Prakash Jha-i produce asü aser Konkona Sensharma aser Ratna Pathak Shah nungeri tongti shilem agir.