Lipukümmung junga mungogo

Alima nung alir ajak asoshi ki ka dang lir aser iba kiji alima ya lir. Aji oda, alima yabo asenok ajak meyong rongsen aser senmang lir, anungji asenok kari danga alima raksatsüsa aser alima nung tzü mopong menentsüsa mapa tilaka dang inyakra, ibajibo peisasa pei telidakba ki janar asütsü. Iba tangatetbaji alima nung alir ajak nem angatetdakja inyaktsü asoshi United Nations-i anir 1973 küm nungi alima ajaklen yashi ama June (Ammi) 5 anogo ya Alima Lipukümmung, World Environment Day, amunger. Aji oda, mezüng küm iba anogomung omenji ‘Alima ka dang’ ta asüba nung munga tenzük aser iba amaji küm shia alima nung taküm alibatem timtemi maitsüsa alima tzü mopong aser arem kümzüka ayutsü asoshi tapet omen balala shimteta amunger. Aji oda, taküm 2025 küm Lipukümmung anogo asoshi shimtetba omenji ” Plastic agi alima menenba anendaktsüdi,” ta liasü. Iba omen nung amendaker, alima kintem den külemi Nagaland nunga government, lokti tentettem, arogo aser kaketeju balalai 2025 küm alima lipukümmung sentong balala ayongzüka mungogo. Taküm küm iba anogomung nung tajung kaji omen dak apet kima yimdong aser kilentzütem nung plastic agi janaba janaonatem bendena endokba mapa inyakogo. Atangji, alima nung plastic agi yangluba osettem amshir mashi-mashi meindoktsü asoshi tangatetba agüja inyakba ya taküm tasen masü saka taküm anogomung omen nung plastic agi alima joko ojang menendaktsütsüla ta ayongzükba agi, nübortemi tangatetba tajung agi taküm kümsa temulung tagütsüba agüja inyakogo. Aji oda, küm shia anogo ka agiteta, alima ya asenok ajak külem ki ta nisungtem nem tangatetba agüja amongba agi asenok nük agi ngua temelenshi tulu ataloker. Joko, alima lipukümmung anogo nung kima yimdong aser kilentzü nung plastic agi janaa aliba bendena merüktetbaji tetenzük ser anogo shia pei alidak pei taküm nung ibaji teinyaktsü tongtibang akümer. Aji oda, karibo ayong nung endoka aliba plastic ajak shitena merüktettsür, kechiyong iba jagi tzü nung aliba taküm sangnu aser shirurutem nem timtem agütsür. Ano, karibo arem aser lenmang nung plastic mashi-mashi endoka aliba bendena endoktsür, kechiyong item jagi ali nung süngdonglidong junga memeyidaktsüi nokdanger. Atangji, tanü lima nung plastic agi yangluba osettem medeniang asen nüngdak jenjang dalang agi ayongayonga meinyaktettsü. Iba jagi dokan-i aodang akhidang ama mapa bolua yangkhu bener maor, kechiyong dokan nung aliba ajak polythene yangkhu nung seper agütsür. Ibaji dang masü saka lokti senden aser benjongbentsü nunga akhidang ama auso marok bendena shitoktsü menüngdaker, kechiyong auso marok, tzü pongdang aser spoon aser fork tashi plastic agi yangluba angur. Atangji, itemjia mamshitsü ozüng agütsür saka mamshi maremer, anungji kenyongi tamshi ta masü saka akok tashi kümdanga amshitsü aser amshir külen mashi nung meindoki ano tanaben tagidak akaba osettem yanglutsü asoshi lenmang sayuteptsü nüngdaker. Joko, tangar tashitemeteter lima nungbo nisungtemi amshir endokba janaonatem meindoki plastic, yin, kaket aser shirepa aotsüba osettem bentetbenteta bendanger balala ayur aser itemji ano tanaben tagidak küm amshitettsüsa yanglutsü purtem dang sen agi ayoker aser melamelaa ali küma aotsüba purtema ali ongken nung bendener. Aji oda, tanü putu ya jana agi sen akümba putu lir. Ibaji meteta kodang asenoki inyakdir, tereprangtsü nunga aser talitsü nunga asen limasa temerükba aser tajungba akümtsü. Plastic yabo teindoka majung aser taronga majung, kechiyong iba jagi mopong menendaktsür, anungji akok tashi mamshitsü merangtsü aser amshiyonga ajema amshitsü aser tanaben tagidak oset küma yanglutem dang ayoktsü bilemtsüla. Aji oda, dokan nungi bener aruba polythene bag-temjia akok tashi anaben asemben amshitsü merangra, ibajia lipuküm merüka ayutsü asoshi agütsüba tenla asütsü. Joko, asenoki angateter asünungji, alima lipukümmung anogo nung dang masü saka mapang mapang shia yimkong nübodoka arem, alu aser ayong nung plastic bendena merükteta inyakra, iba jagi asen lima nungbo tzü moponga, tashidak masü,  mozü amai kümadoktsü.