Lirmen lushi nung Assam Police camp yangluba noktanger

January 24, 2019 nü Lirmen sensopurtemi labour shed raksatsüba yangi noksa nung angur.

Dimapur, January 24 (TYO): January 21, 2019 nü Lirmen Senso rongdak senden ka amendang Border road tema (Lirmen lushi) nung Assam Police camp yanglutsu mesemteta aliba tekaratiba nung nokdangtsu telemtetba agi aser iba ama January 24, 2019 nü Sensopurtemi iba tesem nung kiojen asütsü aliba osettsüset aser labour shed raksatsü.
Iba dak sentakba nung Longchem EAC-i anir yimsüsürtem den IRB platoon ka anir arua iba tesem nung lir. Ano külen Assam police-i arrtsü anasa arua lir, ta Lirmen Senso Mongdang Tir I. Moatemjen aser Tezülur Imnatongzuk nati ashi.
Iba tesem nung Assam police-i camp yanglutsü asameyangba tesemji Lirmen lushi asü nung sensoi ibaji yanglutsü nokdanger. Anungji, Naga nunger ajaki iba ken o nung amalitepa yaritepdaktsür. Ano iba dak sendakba nung state sorkar-ia tekaratiba nung tenük yoka reprangdaktsüner, ta LSM mendenpurtemisa ashi.
Iba onük ajanga Tsuremmen (Lirmen ‘B’) yimtak tensa mejungi lir, anungji senzüsenpongertem kümdanga jajatsü metetdaktsür, ta parnokisa shisem.