Liso nisung teyari agia Mkg dist admin-i jana rungtokba kol ka yangluogo

Mokokchung, April 26, 2020 (TYO): Mokokchung district administration-i Mokokchung nung alir liso nisung kar teyari agia jana rungtokba kol (local incinerator) ka yanglutetogo.
“Iba jana rungtokba kol-ji Mokokchung administration-i yanglutsü apitet aser Aliba nunger Satir Sector nung alir Imliaküm Jamir teyari agia ibaji yanglua liasü”, ta iba osangbeneri Mokokchung Addl. Deputy Commissioner, W. Manpai Phom den jembidang pai ashi.
“Mokokchung Covid19 hospital aser quarantine centre-tem nung janatenbaji tanga janatem den memeyoktepi idangjisa rungtoktsü nükjidong nung iba kol yangluogo aser iba kolji onoki bilemba ama mapa kanga junga inyaker”, ta ashi.
Tang tashi nung iba kol-ji tejang pezü (4) yangluogo aser itemji; ka quarantine centre multi-purpose hall nung, ka T.B Hospital, ka IMDH aser Circuit House kima ka amenokogo aser ano Impur nung ka aser Hotel Metsüben nung ka ayutsü atema tang teyangludak lir, ta paisa shisem.
Iba kol ya Mokokchung market nung anguba osettem amshia yanglu. Kol nungji kerosene teyari agia janaji arunger aser kol telung nungji jana arungba aser mitsü atema tatem (tray) dena keta yanglua lir. Merang tajung amshia yanglur asünung, kol ka renemdang sen 25,000/- shi adoker, ta Mokokchung ADC-isa ashi. “Seretji kwi’ar asütsü makok saka iba kol-ji nisung 6-i dang belenshiteter”, ta paisa shisem.
“Covid19 hospital aser quarantine centre nung amshiba janatemji tanga den meyoktepa amshiba ajanga ashiko lendong menatsüa akok, anungji, lendong matalokdang iba ya inyaktsü shisatet”, ta paisa ashi.
Wb. Imliaküm Jamir den iba osangbeneri jembidang, iba incinerator ya nisung ka kijai dang yanglubo tajemba agi anogo 5 bosa agitsü, nisung 2-i yanglura anogo 2 mesüra 3 shi agitsü, saka tang ya emergency nungdakba agi onok nisung 5-i anogo 1 sür tesadang (half) nung ka yangluzüker, ta ashi. Aritepa yanglur asünung tebelembo kanga belemer, aji saka, lendong mapang amshitsü oset ka yanglur asünung, anibelem ajak amatoka inyaker aser nungdakba oset ka mapang shitak nung yanglutetbaji jangratemtsüka aser pelaa bilemer, ta paisa shisem.
Tanga district nung iba ama inyakbabo angazüka mali, ashiko ibai Nagaland nungbo jana rungtokba yimya tasen ka asütsü amai bilemer, ta pai ashi. Imliaküm ya Clean Mokokchung Campaign nung züngsem tajung ka lir. Pa teyari ajanga CMC teloki Mokokchung town aser temeket tesem balala nung janapong balala yanglur yua kar.
Nungdakba mapang shitak nung district administration-i aginüba ama nisung tapet ka ajurua iba kol ya yanglutetogo. Iba kol ajanga Covid19 den raraba nung teyari angutsü imlar aser iba ya nübur kümzüka ayuba nunga mapa tajung ka asütsü.