Lisopur jangjashiba ren nung police-i aibelen

Guwahati, October 4 (Agencies): Taoba mapang nung Junior Commissioned Officer (JCO) ka nem pa ozüng alema aruba bendanger masü ta jangjashitsüba atema metetdaktsüba dak sendakba nung police temi Mongolbarnü ashiba agi, iba ya aibelena inyakba ,aparen ka liasü. Ajisüaka Mohd Azmal Haque-i ashiba agi, iba ya police temi parnok aibelen mimbangtsüba atema merangerba dang lir.
Chief Minister Sarbananda Sonowal-i iba aibelenba dak sendakba nung bushisüngdanga ken o bentettsü asoshi DGP (Border) nem tetuyuba agütsüogo.
“Nisung tenüng kasa dang asüba ajanga aibelenba amai reprangteter, aser bendanger asütsü ta temolung melemui bilemba nisung nem mesüi JCO nemang osang agüja liasü,” ta Assam DGP Mukesh Sahay-i shi. “JCO Hoque ya asür Md Makbul Hussain’er jabaso lir aser kasa mapang nung bendanger asütsü ta temolung melemi bilemsang ya asür Maqbool Ali’er jabaso lir; tenaprongla Kamrup district nung Boko police station kübok Kalahikash yimtsüng nungi lir. JCO kinungtsü ya Mamtaz Khanam lir aser nisung tangaba kinungtsü tenüngji Mazrul Bibi, tajangjaogo,” ta paisa ashi.
Police-i Kamrup Foreigners’ Tribunal tenüng nung Azmal tang pa 1971 sülen Bangladesh nungi aruba masü saka chichiba India nunger ta asüba kuli tejangja sayutsüba atema asüngdanga liasü.
Sepai mapa nungi anener alisangi ashiba agi: “Ni DGP-i osang agütsüba nguogo, kong pai iba ken o ya aibelen ka ta metetdaktsü. Ajisüaka DGP-i ashiba ama kü tenüng nung aser pa tebu tenüng asür Maqbool Ali ta ser shinga mali ta ni kuli tejangja agütsütettsü. Iba ya kecha masü saka police-i aibelenba mimbangtsü merangerba lir,” ta Azmal-i ashi. paisa ashiba agi, pa tenüng menektsüba aser timtem agütsüba atema compensation asoshi okadak ken o benoktsü.
DGP Sahay-i ashiba iba ken o ya 2008 küm lapokba lir aser Sarbananda Sonowal mapang tenzükba ka masü.
Paisa ashiba agi, police temi mezüngbo iba osang magütsüteti police station-i meyipa bener ao. “Saka mapa nungi anener alisang JCO yagi Border Police temi pa dang iba notice ji pa atema masü asütsü akok, ta shiaka pa tenu ajanga iba notice police station nung agizük,” ta Sahay-i ashi.