Lithrongla G. Chishi-i CITE Nagaland Chapter tenzüktsü

Kohima, Monupii (May) 7 (TYO): Department of Industries and Commerce Nagaland kübok StartUp India programme nung shilem ka ama Nagaland Chapter of Confederation of Indian Tribal Entrepreneurs (CITE) tenzükogo.
Tentonü (Hombar) Commissioner and Secretary of industries and Commerce, Lithrongla G. Chishi-i CITE Nagaland Chapter ji tenzüktsü.
“CITE Nagaland chapter ajanga Nagaland nung entrepreneur jangrartem atema maongka angutsü, anungji business balala atema senotsü agütsüba teyari agitsüla” ta Lithrongla-i ashi.
State sorkari teyariteper ka ama inyaktsü aser pei pei business tenzüknürtem nem loan agütsütsü atema osang prokshitsü, ta laisa ashi.
Entrepreneur temi pei temeten metettsüla aser StartUp India kübok maongka agitsüla. Nagaland nung mapa inyaktsü maongka aika lir, ta Lithrongla-isa shisem.
Naga entrepreneur aikati nendaka meinyaker aser business ketdangsüa aotsü atema sentong tajung matonger. Naga nungertemi sorkari agütsüba grant in aid atema dang masü saka pei indang business mesüdaktsüi aotsü atema merangtsüla, ta laisa ayongzük.
Iba sentong nung National Scheduled Tribe Finance Development Corporation, Ministry of Tribal Affairs Director (non-official), Johny G. Rengma-ia o jembidang, iba confederation tenzükba ajanga entrepreneur temi pei business tenzüktsü atema 6% per annum nung sen aputettsü, ta ashi.
Loan aginürtemi Nagaland Industrial Development Corporation (NIDC)-i lateta aliba onüktem atongtsüla aser nodal department ji Industries and Commerce Department asütsü, ta Johny-isa ashi.
Sentong nung mendenji Joint Secretary, Industries and Commerce Department, Sentiwapang liasü, Industries and Commerce Director I. Bendangliba-i tesentepertem pela agizük aser Lima Longkumer-i anküp tepela o jembi.
Züngsem trok agi akümba CITE Nagaland Chapter nung Lima Longkumer convenor asütsü.