Living Bread Ministry küm ter ajungba mung mungogo

Dimapur, September 16 (TYO) : Living Bread Ministry ya Tsüngremer tejembiba ajanga 15th Sept 2006, anogo nung tenzük aser Tsüngremer mapa takok ngua inyaka arur küm ter abensaba anogo mung temenungratsüka aser jangratemtsüka mungtetogo. Sentong tetenzük azüazüa Wt Shitoli Yadener telok ajanga ken den külemi tsüngkang tajung ka agi shilem agi.
Tamasa sentong kecha tenzüka maodang Living Bread Ministry nung züngsem asem alima nungi Tsüngremi jar aobatem bilemteta lokdi ajunga nokdaker mapang tatsüka olajang kata madoki mokorai ajemajema atasaa alidang Purana Bazar “B” Ao Baptist arogo nung Associate pastor woman Kr. Bendanglai, Kibubai jar aoba tanelatem Yisu den anisüngzükdakjang aser akümlir tsürabur, adianutem mulungjang tesünep nung yujang ta sarasademtsü. Sentong ajunga Kr. Walusangla Jamir aser Kr. Sentirenla Jamir nati kütdang asü aser ministry tenzüksang Wb. S. Aosüngküm Ozükümi tarur ajak pelaa agizük.
Iba sülen tsüraburtem rongnungi Wt Bendangmenla aser Wt Sentila pongen nati, parnok chirtem tangar memenep asünung parnok dena atsükoker temulung mesangwateti alidang Living Bread Ministry-i sarasadema onok ajung meso aser anepalua tzü sendaktsüba ajanga tanübo ozü jala jabaso tangar memenep süaka jashia mebilemer, saka ibai Tsüngremer temoatsü ta züngshir ta lokdi matsüngdang kuli asü. LBM-i nüngtet süa jaokba ama Deaf Biblical Ministry nungi Sign language amshia ken tajung ka aten aser Rev. I. Longsa Memorial Orphanage home nung alir tanurtemia nübor mulungjang arakzüdakja ken ka aten, ano ministry züngsemtem nungi Kr. Ajungla aser medemer, Kr. Imsüsenla,Wb. Mangyang pongen nungeri ken atenba ngua tesenteper ajunga tenük nung tepela nüktzü aidok, kechiaser iba mapangji atangji ya Tsüngremi sempet balaka küter yanglu ta kuli tejangja angu.
Iba sentong nung tayongzükba aser tajungshi o jembir Wb. K. Tsükti jamiri ashiba agi, tanü alima nung lokdi tentet aika indang tangatetba, inyakyim nung item nübortem asoshi 5% alakteta shiteta yutsür ta ashi aser tanü LBM küm ter ajungbaji tatem ka atonger masü, saka ano mapa tuluba aser tabensaba inyaktsü tetenzüker asünung Tsüngrem dang tashi meshia nükla tuluba nung meranga inyakang ta shisemba den külemi tsüraburtemi yamai anepaluba angudang kanga pelar ta ayongzüka pa o atem. Sarasadem ya tashi tulu asünung sentongi aginüba ama Wb.I. Jongpong Imsong Pastor East Dimapur Ao Baptist Arogo sannükeri Matamabensartem ajak asoshi bendanga agütsüba sarasadem ka agiba sülen, Tsüngremi yimya balaka nung yangluba adianu, ayaanu, jala jabasotem parnok nisung shia nem LBM-i sempet kaka renemja akaba Wt Purtila Asst propissor Gov’t college, Dimapur lai iba senpet lemsaa agütsüba den külemi lar jala ka shiba tangar memenep lir iba otsü dak rongloker tarur aser tsürabur ajak nem tayongzükba tulu agütsü. Lai ashiba agi jala jabasotem ya tangar memenep masü oda Tsüngremi asenok nem sempet ka ama agütsüogo, ya asen mission lir ta laisa nenshia shisem.
Ano kuli ka ashibaji Doctor-i la mejajatsü ta ashi, saka Tsüngrem dak teimla tulu ayu nung aoksaa nokdakteta jajatsü tenzük aser o jembitsü tenzük ta lai lar jala la küt agi anepalua ammang sangwa metitemi anepaluba otsü den LBM nungi  S. Aosüngküm ozükümi tsüngdong arua semdanga teimla lemsatepba indang shia la o atem. Iba sülen Naga nung kentener tajungtem rongnung ken mejemer, ken tener, sayutsüngir Wb “Sünep Lemtur”  Yisu kü tembar ta kuli süa ken tajung ka atenba ajanga tesentepertem ajunga temoatsü angu aser iba sülen tang lanurtem rongnung ken mejemer, kentener “Alobo Naga” ajanga ken tajung ka aten. Sentong tetenzükdang Rev. Dr. T. Lima Ozükümi tashi tasen ka meshia sarasadem aser sentong ajak takok nung len aniba asoshi S. Lanu Pastor Purana Bazar “B” Ao Baptist Arogo sannükeri moaja sarasadema sentong tatem aküm.