LK Advani menden, Gandhinagar nungi Amit Shah-i tokteptsü

New Delhi, March 22 (Agencies): BJP-i taruba Lok Sabha election nung Gandhinagar menden nungi L K Advani agiener BJP National Tir, Amit Shah toktepdaktsütsü; ibaji ajanga BJP yangerba nung tongtibang shilem agir arishi küm 91, Advani yimtenren nung tatembang kati arur asütsü.
Iba osang sangdongba sülen Congress Party-ibo, BJP-i Advani indang menden rakzükogo, ta aitsü.
Taküm May ita nung Ato kilonser Narendra Modi-i aniba teloktep-i takok ngua tanaben sorkar kümra, aser Amit Shah-ia election nung takok ngura pai sorkar nung tongtibang shilem agitsü.
BJP-i Varanasi (Uttar Pradesh) menden atema Modi maneni shimogo aser Amethi amenden nung textiles Minister Smriti Irani-i Congress Tir, Rahul Gandhi den tokteptsü.
Ano külen BJP-i tang teinyakdak MP 17 nem ticket magutsü aser parnok trokbo Uttar Pradesh nungi lir.
2014 küm General election nung Union Minister Smriti Irani-i Congress party candidate, Rahul Gandhi den toktep ajisüaka tera agi takok mangu, aser taküma kasa menden nung lai Rahul den tokteptsü.
BJP candidates mezüngbuba tarensen sangdongba nungbo tetsür 22 dang lir, aser ibaji BJD aser TMC nungi tetsür candidates den ishiba lir.
1984 küm election nung BJP-i tamakok mejungi angu sülen party tanaben asentenshiba nung LK Advani-i tongtibang shilem ka agia liasü, saka takümbo party-i pa sendokogo. Pai Gandhinagar menden nungi trokben takok ngua liasü.
BJP-i maneni party nung tongtibang lenirtem aika kasa menden nungsa toktepdaktsütsü, aser parnok rongnung Union Home Minister Rajnath Singh (Lucknow menden) aser Transport Union Minister Nitin Gadkari (Nagpur) na densema lir.