LKM CECC bank account lapokogo

Dimapur, Sept.22 (TYO) : Nagaland nung Langpangkong kübok aliba assembly constituency asem nungi tenzüka election timi agitsü asoshi Langpangkong Kaketshir Mongdang (LKM) Clean Election Campaign Committee ajanga September 3, 2016 nü nungi nübortem den senden lia mapa tenzükogo aser iba maparen asoshi senotsü tenla agütsünertem atema temulunger tenla agütsütsü atema SBI nung account ka lapokogo.
Iba ‘Clean Election Campaign’ sentong nung nübo, mapang aser rongsen aika nüngdaktsü aser iba atemaji tenla meshia senzütsübaji tim masü amai bilemer, anungji peisasa mulungteta pei tangatetba yari agütsütsü asoshi bank account ya lapoktsür, ta LKM CECC nung lenirtemi metetdaktsü.
Anungji, iba account nung kija, kibong, lokti aser Arogotemi sarasadema tenladaktsüner ta parnokisa mepishia metetdaktsüogo. Iba sen aruba aser endokba osang ya mapang shia nübortem nem metetdaktsütsü, ta parnokisa metetdaktsü.
Iba account number tenüngji LKMCECC alitsü aser number ji  36102263243, SBI Main Branch, Kohima nung alitsü.
“Taoba election tashi nung asenok aikati candidate dang sen meshiogo saka tangbo asenokiang election timi agitsü asoshi sen tenla agütsü tenzükdi,” ta LKM CECC-isa tayongzükba ka metetdaktsüogo.