LKM CECC-i Bank account ka lapoktsü

Dimapur, Sept.04 (TYO): Nagaland nung election timi magitetba ajanga bener aruba temenentem Langpangkong nungi tenzüker merüktettsü asoshi Langpangkong Kaketshir Mongdang (LKM) ajanga Clean Election Campaign Committee (CECC) ka tenteter inyak tenzükogo.
Iba election temenentem merüktettsü asoshi tenzükba sentong ka yashi Honibar nü Chuchuyimlang nung Langpangkong kübok aliba yimtsüng aser town shia nungi yimten, Arogo aser lokti tentettem nungi lenirtem adenshia ajaki shilem agitsü nangzüktepogo.
Iba sentong dak aketba mapatem inyaka aotsü asoshi senotsü nüngdaker asünungji, temulungertemi pei alidak nungi tenla agütsütettsü atema bank account ka lapoktsü asoshi LKM CECC ajanga telemtetba agiogo.
Iba bank account ya lapoker osangkakettem nung metetdaktsütsü, anungji kija kibong, lokti tentet aser Arogotemi asen lima yanglushiba maparen nung endoktsü asoshi iba bank account nung tenla enokdaktsüner, ta LKM CECC-i mepishia metetdaktsüogo.
LKM CECC ajanga Langpangkong nung election temenentem merüktettsü apusoba mapa ya memerüktet tashi inyaktsü aser iba ya ajanga Nagaland ajunga nung temelenshi tajung adoktsü imlar ta parnokisa metetdaktsü.
Honibar nü Langpangkong High School, Chuchuyimlang nung akaba lokti senden nung LKM CECC ajanga putetba election tajangzük aser election  temenentem kar metetdakja liasü.
Election tajangzüktem rongnung takar-sensaker, tulur tilar, kin tulu aser kin tila kecha tebendang mali ajak nem temeten kasasa agütsür; pei tangatetba yari pei mulungba agi yimten yimsüsür shimba nung shilem agitsü maongka sademsadema agütsür; chuba shimer akümer (king makers) anungji chuba dang nungibo nübortem tashi tuluba akümer; Pei lima aser nübortem asoshi tajung inyaktsü bilemba mangdang aser sentongtem election mapang candidate-tem nem shidakja nangzükdaktsür; pei lima aser nübortem asoshi jembia inyaktsü atema nisung tetemsütiba ka shimtsü maongka angur; yimsüsürtemi nübortem nükentsübua inyaker; majunger, mapa makoker aser ochimashir melentsü maongka angur ta LKM CECC-isa metetdaktsü.
Ano, election temenentem rongnung  Electoral roll nung nisung tiyazü enokba; nisung tetemsü masü sen akar bushiba, sen aser mapayong pei vote ayokba, yimjemba aser nüktapangta ajanga taküm aser kibong raksaba; nübortem asoshi masü pei asoshi sen bushitsü electioni aiba, constituency tenüng nung masü pei yim tenüng nung electioni aiba; tangar melen vote agütsüba; telok tentetter candidate dang sen meshiba aser bendanglen alirtem nem yimtaklirtem amoksepdaktsüba mapatem asütsü ta parnokisa metetdaktsü.
Ibai asenoksasa asenok temenen bushia nangzükba mapang lir aser tanüngbajibo Tsüngremi dang inyaktsü ta LKM CECC lenirtemisa metetdaktsü.
Iba election tashidak aneptsü asoshi yashi lokti pangzüng kar renemogo aser itemji mapa küma inyaktsü asoshi CECC purtem Langpangkong kübok yimtsüng aser town shia sema aotsü telemtetba agiogo.