LKM CECC-i yimtenren telok balala nungi lennrtem den senden amen

Dimapur, April 22 (TYO): April 22, 2017 nü Langpangkong Kaketshir Mungdang Clean Election Campaign Committee (LKM CECC)-i Langpangkong tzükong nungi yimtenren telok balala nungi lennirtem den külem senden ka amen.
Sendenji Hotel Metsupen, Mokokchung nung ayonga amen aser iba mapang Election Merüka agitsü dak sendakba onüktem benoka lemsatep, ta LKMCECC sangdong ka nung metetdaktsü.
Senden nungsa September 3, 2016 nü election merüka agitsü atema “Chuchuyimlang Resolution” meyipa reprangshi aser iba mapa takok ngua inyaktsü atema bangzünga ayu.
Senden nungsa Clean Election maparen pusema nungittsü aser LKMCECC den yaritepa election nung tim masüba inyakyimtem merüktettsü telemtetba agi.
Senden nung adenertemi LKMCECC-i Clean Election dak sendakba mapa meranga inyakba atema tenüngsang agütsü aser Langpangkong tzükong nungi yimtenren lennirtem, Nagaland Legislative Assembly nung tang teinyakdak MLA tem, village council züngsemtem aser arogo lennirtem den tekaratiba nung külem senden ka amentsü tebilemba lemsatep, ta LKMCECC sangdong nungsa metetdaktsü.
Senden nungsa Langpangkong tzükong kübok assembly constituency tem nung election mapang ochimashi azüoktsü atema political party/Independent candidate tem asoshi senotsü bendentsü atema Party Fund Raising Committee tentettsü tebilemba lemsatep, ta parnokisa ashi.