LKM-i anir SDZ indang jembia terenlok mapa tenzükdaktsütsü

Dimapur, Jan.16 (TYO):  Nagaland sorkari tenemtsünglen yimti tulu küma renloka aotsü asoshi sentong ka bilemdanga “Special Development Zone” (SDZ) tenüng nung inyaktsü benoka aliba ken o ji bena arua jembitsü asoshi nüngdakba purtem den shisalemsatepba sentong ka taküm 2016 kümsa alitsü ta tan Tuli nung LKM lokti senden aser saisapong aliba mapang telemtetba agiogo.
SDZ sentong ya kodang mapa küma odir, Assam tsütsü Nagaland tenemtsünglen aliba li ajak ya jenjang aketba li kümdaktsütsü aser ken o terenemba yur bendanglen nungi takartem jaoka mapa inyakdaktsütsü ta shia lir. Anungji, ILP dak dena kongshitsüsa akümtsü ta iba sentong yanglurtemi shia lir.
Iba sentong ya yaküm küm sorkari metetdaktsüba sülen nübortemi mapa küma aotsü nokdang. Iba jagi tang iba ken o ya tejembia mejembii dang mejanga lir.
Ano kasa LKM mongdang nungsa, LKM-i anir Langpangkong nung nakmati atuba indang mongin nisungtem jaoka jungjunga jembitsü aser ano alu tajungba ayimtsü lenmang sayuteptsü asoshi Agri & Allied department-tem nungi  ketdangser aser ano agri scientist-tem anir arua sensaksem ka alitsü.
LKM-isa Tribal Affairs Ministry aser Youth & Sports ministry den jembitepa Tuli nung  Skill Development Center ka lapoktsü aser Multipurpose complex ka yanglutsü lemtetogo.
Ano, taküm nungi Tuli nung küm shia Youth & Sports festival alitsü asoshi sorkar den jembitsü aser ano Langpangkong nung Government aser private school majungba indang kulitem bushia jungdaktsütsü merangtsü atema LKM-i Research & Evaluation Committee ka shimtsü lemtet.
Iba denji ano LKM-i Hindustan Paper Corporation dang center sorkari sen agütsüaka paper mill melapoktetba kuli meshitsü aser melapoktettsüsaka süra paper mill-i ali agia alibaji tanga nüngdak nung amshitsü asoshi meyipa meshitsü ta LKM-isa lemtetogo.
Ano, taruba Nagaland assembly election tipdema shitak agitettsü atema LKM-i kanga khuretsa bilema jelia nübortem nem tangatetba agüja inyaktsü ta telemtetba agiogo.
Saisapong dak aketba telemtetba ka nung taruba saisapong sentong nungi football nung takok angur nem tang agüja aliba takok marok den senpet sen Rs.1.00 lakh aser runner up nem sen Rs.50,000/- aser ano volleyball takoker nem senpet sen Rs.50.000/- aser runner up nem sen Rs.25,000/- agütsütsü lemteta yuogo.
Govt school nung azüngertem asoshi osang tajung kaji, taküm 2016 küm nungi Langpangkong kaketshirtem Govt High School nung azüngertem class 10 (HSLC) tatidang nung takok angurtem  rongnung tematiba takok angur nem “L.L.Yaden Meritorious Scholarship” sen Rs.50,000/- agütsütsü. Iba sen ya asür L.L.Yadener jabaso Wb.Geoffrey Yaden aser par kibongi tenlar.
Ano, asayartem nem jenjang tajungba kümdaktsütsü nükjidong nung taküm küm nungi Langpangkong Football team ka aser Volleyball team ka shimer tesem balala nung asayadaktsütsü LKM lokti senden nung telemtetba agiogo.
Tanü asüng nisungtemi junga mebilemdangi ali telong nung aliba mijang (nakmati) mashimashi atuba ajanga tzü mopong meshitak akümba den yimtsüng karbo lendong ajurutsü ana nung alinungji, tekaratiba nung nakmati atuba nung mongintem jaoka shisalemsatepa tangatetba agütsüba sentong ka alitsü LKM-isa lemtetogo.