LKM-i “Clean Election Manifesto” metetdaktsü

Honibarnü Chuchuyimlang nung LKMCECC züngsemtem den Langpangkong tzükong nungi lennirtem clean election indang senden nung külemi agiba noksa ka angur.

Dimapur, July 02 : Tang Nagaland nung aser talisa Langpangkong nung election timi agitsü asoshi ajungshitepa inyakba mapa ya takok dang masü saka nübortem asoshi tajangzük lia inyaktettsü asoshi Langpangkong Kaketshir Mongdang-i Clean Election Manifesto ka sayaogo.
Iba Clean Election Manifesto ya Honibar nü Chuchuyimlang nung LKM Clean Election Campaign Committee (LKMCECC) purtemi ayongzükba senden ka nung Langpangkong Tzükong Mongdang, Langpangkong Watsü Telongjem aser LKM kübok yimtsüng aser town kaketshir telongjemtem nungi tongti ketdangpurem den LKM mendenpurtem, advisors, executive members aser LKMCECC züngsemtem ajaki mulunga agizüka yuogo.
Iba Manifesto nung teinyaktsü onük ter keta lir aser mezüngbuba nung, ” Senso shia yimten nung kasasa temeten lir, anungji election mapang pei vote peisasa enoktsü,” ta metetdakja lir.
“Vote ya yoka achitsü yangluba oset ka masü saka Tsüngremi taso dang nungi senso shia nem agütsüba yimten temeten ta angateta, vote mayoktsü saka pei vote ajanga pei lima asoshi telemtetba agiba nung ochishia aser tasü itta shilem agitsü,” ta LKM Clean Election manifesto nungsa metetdaktsü.
Kasa manifesto nungsa ashiba agi, “Politics ya pei agitsü inyakba business mapa ka masü saka pei tetsü tasoli aser pei nübortem tenzükba Public Service ka kümdaktsütsü.”
LKMCECC Manifesto nungsa election-i airtem nem lanur tazünger aser mazünger ajak peii yari mapa inyaka litettsü asoshi parnok mangdang aser lenmang sayudaktsütsü aser itemji election sülen mapa küma inyaktsüsa yariteptsü ta nangzüka lir.
Iba Manifesto nungsa, takar sensaker aser tulur tilar kecha mebendangi mozü kidang sen jenjang dalang agi aser angatia taneptsü angutsüsa aser kaketrejutem nunga shisaren tajung angati angutsüsa yimsüsürtem tajung shimba nung shilem agitsü ta renema lir.
LKMCECC Manifesto nungsa tanü tsürabur aser lanurtem pei taküm aser kibong agi pei nümamedangtettsüsa aliba maksü jenjang nungi anitettsü asoshi ochishiba yimten yimli ka asoshi inyaktsü ta nangzüka lir.
Item tangatetba onük aser tebilemtsütemji nübortem den lemsateptsü asoshi tan July 18 nungi tenzüka LKMCECC purtemi Langpangkong nung yimtsüng ajak sema aotsü sentong renemogo.
Yakanü kasa senden nungsa tongtibang sarasadem mapang ka agia lokti menendaktsüba temenen ter nungi pilaa alitsü asoshi tenangzükba agia liasü. Item lokti menendaktsüba temenentemji itemi liasü : Meinyaki bendenba rongsen, Meinyaki chiyongba taküm, Tangatetba mali jangratema aliba, Tazünger aser Temetetter saka mazüokba jakla, Tajung majung mebendang tajangzük bushiba, Tangatetba mali yimten nung shilem agiba, Tangar dak dang metaloka aliba, Tangatetba agi masü tashiyim agi akokba, Nübortembo memeim linükang meimba aser O dang mapa maliba taküm.
Tang tashi nung asen lima nung election timi agitsü merangba sentong nung sarasadem, shisatsü, rongsen aser nübo agi yarirtem ajak dang kanga pelar ta LKMCECC-i metetdaktsü aser ano tanü asen lokti nung temenen tulutiba den raraba tongpang nung ya senso ajak longjemer takok mangu tashi raraner ta parnokisa mepishia metetdaktsü.