LKM-i HSLC & HSSLC Tatidang Agütsüba Tesem Semdang

Government Higher Secondary School, Tuli nung kaketshirtem tatidang züluba yangi noksa nung angur.  (Tuli, Feb. 13, 2019)

Changtongya, February 13, 2019: Yashi nungi tenzüka Langpangkong tzükong telongzük nung HSLC & HSSLC tatidang kaketshir 391-i agütsüdagi. R.C. Chiten Jamir Memorial GHS, Changtongya aser Govt. Higher Secondary School, Tuli nung iba tatidang agir. February 13 anogo LKM Tir Washimong Sadem Longkumer aser Tongti Zülur Temjentoshi Jamir-i anir LKM ketdangpurtem iba Examination Centre ana semdanga Kaketshirtem, Tesayurtem aser ketdangsürtem den ajura senzüa liasü.
“HSLC & HSSLC tatidang ya Kaketshir ka asoshi süngküm tongtibang aser tulu ana lir. Shisaliok tsütsü ibai majangi tanga lenmang bushia aotsü tasak. Anungji kaketshirtemi meranga zünger iba tatidang agütsütsü merangang” ta LKM Tir Washimong Sadem Longkumer-i Kaketshir ayongzük.
Küsa mapang nung LKM ajanga Kaketshir ajak nem ajungmesoba oren tajung zülur bookmark kaka agütsüa liasü.
Examination Centre Changtongya Superintendent N. Temsu Lkr-i ashiba agi Changtongya Centre nung school ti (8) nungi HSCL tatidang agütsür 93 lir. Parnok rongnungi tebur 44 aser tetsür 49. Yamaji Tuli Centre nung HSLC tatidang agütsür school 12 nung Kaketshir 202. Tebur 74 aser tetsür 128. Iba den HSSCL tatidang agütsür 96 lir, ta Centre Superintendent Toshilemla-i shia liasü.