LKM-i L. Pangersowa aser L.L Yaden award agütsüogo

Sentong nung alakteta jaoker T. Aochuba Longkumer, Award angur ana, AKM President, LKM President-i anir office bears, sentong nung shilem agirtem, LKM nung Advisor aser sanen luden züngsemtem kar noksa nung angur.

Mokokchung, June 22 (TYO): Langpangkong Kaketshir Mungdang (LKM)-i achaayanga June 22, 2017 anogo Town Hall, Chuchu Town nung LKM foundation anogo amungba den külemi küm shia agüja aruba ama L. Pangersowa Trust Award for Academic Excellence aser L.L Yaden Meritorious Scholarship award agütsüba sentong agiogo.
L. Pangersowa Trust Award for Academic Excellence ya Langpangkong nunger Kaketshir HSLC nung school-tem ajak nungi tematiba jenjang nguteter nem kuli kaket den sen senpet 20000/- agütsür aser iba award ya Moamanen-i agizüka liasü. Moamanen ya Changtongya nunger Shilutemjen aser Imlisenla na jabaso lir aser pai Fernwood School Kohima nungi HSLC nung Top 10 jenjang ajangzüktet. Sentong nung Moamanen arua medentetba ajanga par tsüraburi senpet agizükja liasü.
L.L Yaden Meritorious Scholarship award ya-a HSLC nung Langpangkong nunger kaketshirtem sorkar school-tem nungi tematiba jenjang nung takok nguteter nem kuli kaket den sen senpet 50000/- agütsür aser ibaaward ya Lipokrenla-i agizüka liasü. Lipokrenla ya Chuchuyimlang-tsür Temsümongba aser Onennungla jala lir aser la ya Langpangkong Govt. High School, Chuchuyimlang nungi liasü.
Sentong nung alakteta jaoker T. Aochuba Longkumer IFS Divisional Forest Officer, Mon Govt. of Nagaland-i jembidang tanü asen lima ochimashiba indang jembir, terenlok nüngdaka aliba aser tangar dang nungi tajungtiba asütsü atema toktepba tensa ka nung alir aser item ajakji koktettsü atema tanü shisaluyimer dak dang keta lir ta kaketshirtem ayongzüka ashi. Tanü asen lima tebilemtsü agi sünger aliba ajanga lenir tajung shimtettsü nükla yur Clean Election ya tenzük aser ibaji takok nguteta aotsübaji shisaluyimertem dak tuluka keta lir ta paisa shia liasü.
Award angurtem rongnungi Lipokmenla-ia tatsüka jembidang, lai iba award ngutetba ya la kija agi meranga azüngbayong masü saka tsürabur mim tamang sarasadem aser Tsüngremi agütsüba sempet angateta tesayurtemi nendaka meranga sayuba ajanga dang lir ta shia liasü.
Imtisungkum Lemtur, LKM General Secretary-i ketdangsüa aniba sentong nungsa Supongmatong, LKM Treasure-i sentong moaja sarasadem aser Imnakika Jamir, LKM President; Imkongwati AKM President; Ao Sanen Pongen Chuchuyimlang Village Council Chairman; I.Temsumangyang LKM Advisor nungertemia shilem agia jembiba den Unger students Union ajanga ken tena telok ayongzük aser Rwv. Temjen Chuchu Town Baptist Arogo sannüker-i kaketshirtem atema alakteta sarasademtsü.