LKM saisapong sentong Sonowal-i lapoktsütsü

Dimapur, Jan.10 (TYO) : Langpangkong Kaketshir Mungdang (LKM) 31 buba lokti senden aser saisapong sentong January 12 nungi 15 tashi Tuli nung alitsü asoshi Merangkong yimten aser kaketshirtemi maparen ajak renema lir.
Iba saisapong sentong ya January 13 anepdang 11:00 ako nung Union minister of state (Independent Charge) for Youth & Sports, Wb. Sarbananda Sonowal-i lapoktsütsü.
Iba sentong nung mezüngbo Union Tribal Affairs minister, Wb.Jual Oram arutsüba liasü saka pa ajungbena bendanglen sentong nung ka nung oa adentsüsa akümba agi pa marutetter.
Tanü LKM sangdong ka nung ashiba agi, Union minister, Sonowal-ji January 13, 2016 anepdang Tuli 11:00 ako shi nung dang atongtsü, anungji mapang kümzüktsü mechi football league match-tembo anepdang 7:00 ako nungi pa maru tashi asayaa atatsü.
Tan LKM saisapong sentong nung teburtem football aser volleyball asayatsü aser tetsürtem volleyball asayatsü.
Saisapong sentong metenzükdang, lokti senden sentongbo January 12 aonung nungi tenzüktsü aser iba sentong nung Parliamentary Secretary, Wb.Amenba Yaden tetushi tejaoker asütsü.
Iba LKM lokti senden omen ya “Tekümküm Nükmen” ta shimteta lir aser iba omen nung January 13 aonung sentep sentong nung Nagaland Vigilance & Anti-Corruption nung Director & DIGP Wb.I. Meyionen Jamir-i jembitsü.
Iba saisapong sentong January 15 nikongdang atemtsü aser iba sentong nung Parliamentary Secretary, Land Resources & Excise, Wb.B.S.Nganlang tetushi tejaoker asütsü aser tesüsaba aonung sentong nung tetushi tejaoker, Parliamentary Secretary, S.Chuba Longkumer asütsü.