LKMCECC-i ayongzüker

Langpangkong litsü nung aliba constituency asem nung election merüka agitsü atema taoba küm Langpangkong yimtsüng aser Town unit 33 nungi yimten yimsüsür, Arogo tenzüker, Watsü telen, Kaketshir Telongjemtem, Goanbora aser Dobashitem sentepa pangzüng (resolutions) renembatem, ano maneni atsüng-akangshitsü atema Langpangkong Kaketshir Mongdang Clean Election Campaign Commitee (LKMCECC) ajanga 1st July 2017 nü LKM Conference Hall, Chuchuyimlang nung telongjem senden ka ayongzüka agiogo.
Iba senden nung, 3rd September 2016 ‘Chuchuyimlang Resolution’ nung aliba ama 18th July, 2017 nungi tenzüka phase ana lemsar LKMCECC teloki yimtsüngtem sema jajatsü. Iba touring senzüba mapang, election merüka agitsü atema teinyaktsü maparen aser sentongtem asameyangtsü aser resolution nung shia aliba ama Yimtsüng ajak nung yimten yimsüsür lenisüba kübok Action Committee tentettsü.
Election mapang nung “nisung shiai pei vote peii agütsütsü, candidate dang sen memeshitsü, pei vote dak alaka tangar vote menoktsütsü, rarapangsen masütsü, temesepba chiyongtsü mamshitsü” item mapa ya nisung shiai inyaktetra, clean election-ji aji asütsü ta tangatetba nung, tesenteper loktitemi ano maneni ‘Temenen Ter’ nungi pilaa alitsü tenangzükba ka LTM, Watsü aser LKM lenirtemi anir Tsüngrem dang sarasadema agia liasü.
Iba dak alaka LKM CECC-i clean election Manifesto ka renema, iba Manifesto nung ajemdaker clean election inyakyim ajak inyaka aotsü telemtetba agiogo.
Langpangkong litsü nung election merüka agitsü lemtetba ya political party kar mesüra, election nung shilem agitsü pur mesüra yimtsüng kar anema inyakba sentong ka masü saka, 26th LKM Lokti Mongdangti Tuli nung among dang lemtetba Pangzüng nung ajemdaker, election nung benshiba mapa tamajungtem melenshitsü aser ibaji ajanga asen lima tangar menepa tejakleni aotsü nükjidong tulur yur inyaker. Anungji, Langpangkong nunger dang masü saka asen lima aser nübortem meimer ajaki ano maneni election timi agitsü merangba mapa nung ya nungita yaritsü ayongzüker.
Langpangkong Tzükong yanglushiba maparen aser inyakyim nung kija mesüra telok kari danga pei nija aser pei yimtsüng ajangzüktsü tebilemba tamajung (ill motives) yur tenokdangba agütsüra, Langpangkong nunger ajak longjemer tasa tamajung atonger, tenokdangba agütsür anema nokdaktsü renema alitsü maneni LKMCECC ajanga metetdaktsür.
Alima nung temelenshi arutsü, atema mapa tila ka nungi tenzüktsü, mesüra mera ka nungi apusotsü. Anungji Naga lima yanglushiba nung tetsür-tebur senso shiai shilem tajung agitsü nükla tajung yur election temenentem toktsütsü LKMCECC ajanga ayongzüker.