LKMCECC-i sarasademtsü ayongzüker

Dimapur. August 31 (TYO): Nagaland ajunga den külemi Langpangkong nunga election timi agitsü asoshi taoba 2016 küm Chuchuyimlang nung September 3 nü yimten, Arogo aser lokti tentet lenirtem adenshia nangzükteper Clean election campaign tenzükba küm ka tan September 3, 2017 Deobar nü ajungtsü, anungji iba anepdang 6:00 ako nungi minute 30 LKMCECC züngsemtem den külemi nübortem ajaki pei pei alidak sarasadem mapang agidaktsüner, ta LKMCECC sangdong ka ajanga mepishia metetdaktsüogo.
“Taoba küm ka piyong tesem balala nung nübortem ajurua election nung nisung ajaki ochishia shilem agitsü nüngdakba indang jembia jajadang Tsüngremi kanga yariogo aser nübortemia tangatetba tajung sayua shilem agiogo, item ajak asoshi nübortem dang pelar aser Tsüngrem tenüng asanger,” ta LKMCECC purtemisa metetdaktsüogo.
Taoba küm ka tsüngda LKMCECC-i Changtongya aser Tuli town na nung lokti senden ayonga ‘Clean election’ nüngdakba indang jembia liasü. Iba sülen Kohima, Dimapur aser Mokokchung nung Langpangkong nunger lokti aser yimten lenirtem den shisalemsatepba sentong agia liasü. Tang tashi nung Chuchuyimlang nung September 3, 2016 nü lemtetba ama, Langpangkong nung aliba yim aser town ajak tonga oagi election timi agitsü asoshi lemtetba pangzüngtem akangshia shisalemsatepogo.
LKMCECC-isa Langpangkong nung aliba Arogotem dang taruba Deobar September 3, 2017 nü temoatsü sentep nung Tsüngrem nem tenüngsang agütsüba aser ano Clean election atema inyakba mapatem takok angutsü asoshi taochi aser tashi meshia lokti sarasadem mapang ka ayongzüka agidaktsüner, ta mepishia metetdaktsüogo.
“Clean election campaign ya asenoki inyakba ochimashi temenen mapatem anema raraba mapa ka asünungji, ibai tanüla tongpang lir, anungji sarasadema inyak nung dang akoktsü,” ta LKMCECC-isa ayongzük.