LoC anasa Launching pads nung kiralongrartem lir: Lt. Gen. Bhatt

Srinagar, Tsükali 26 (Agencies): Kashmir telungi aittsü atema kiralongrartem aika Line of Control (LoC) anasa Launch pads nung lir, iba den külemi ozüng alema arrtsü telungi aitdaktsütsü atema Pakistan-i cease-fire ozüng alema inyaker, ta tanü Srinagar nung Army commander kati metetdaktsü.
General Officer Commanding Chinar Corps, Lt Gen A K Bhatt-i, “Launching pads nung kiralongrar aika aliba osang lir, aser joko rürjep ajema alar asünungji kobi melii parnoki arrtsü adena ait tenzüktsü imlar,” ta metetdaktsü.
Jammu and Kashmir Light Infantry Centre passing out parade nung jembidang pai, “Ajisüaka onoki ibaji anema inyaktsü renema lir. Pakistan tsütsülen nungi tanen makai injang yokbaji arrtsü alema tangar aitdaktsütsü atema inyaker südi. Koba mapang nungsa Pakistan-i injang yokdir ibaji arrtsü adena aitdaktsütsü atema lir. Kupwara aser Tangdhar nunga kasaji atalokogo,” ta paisa ashi.
Bhatt-isa, LoC anasa Lepa valley nungi Mandal area tashi nung kiralongrartemji telok aika atatepa lir, aser telok shia nungji parnok 30-40 shi lir, ta ashi.
Pakistan-i yimdaklirtem dang yimtsüngtem azüngtettsütsü atema metetdaktsü, ta osang prokba dak sendakba nung Bhatt-i, ibaji Kashmir nung aliba yimtsüngtem nem metetdaktsüba masü saka Pakistan arrtsülen aliba yimtsüngtem nem metetdaktsüba lir, ta ashi.
“Parnoki (Pakistan) yimtsüng kar dang yim azüngetja alitsü metetdaktsü, ajisüaka ni angazükba agi yimdaklirtem jagi pei yim mazüngtettsü,” ta paisa ashi.