LoC nung army-i kiralongrartem amak

September 29 (Agencies): Bodhbar ayaterm nung India army temi Line of Control (LoC) nung kiralongrartem amakba sülen Brihostibarnü Ministry of External Affairs-i P5 (UN Security Council Permanent züngsem linüktem)- China, France, Russia, UK aser US, Germany densema linük balala ketdangsertem dang iba osang metetdaktsüogo.

Kiralongrartemi India amaktsü sentong aliba nokdangtsü atema ajungbena India army temi arrtsülen kiralongrartem amakba osang ya Director General of Military Operations (DGMO) Lt Gen Ranbir Singh-i sangdonga liasü.

September 18, 2016 nü Pakistan nung amenoka aliba kiralongrar telok JeM-i Kashmir, Uri nung army camp ka amakba sülen anogo 11 lir yasüng ayaterm nung tenzüka tanep 4:30 ako tsüngda Indian army temi kiralongrartem makogo.

Osang ka ajanga ashiba agi, army temi iba operation aodang kiralongrar 35-40 aser Pakistan army teku tepsetogo.

Kiralongrartemi army 18 tepsetba sülen Ato kilonser, Narendra Modi-i, sepai 18 taküm bendanga asübaji amajok masütsü, aibelenertem nem temerenshi magütsüiang malitsü, ta nangzüka liasü.

Tanü osangbnertem senden ka nung General Singh-i, “Jammu & Kashmir densema linük nung tesem balala amaktsü nükjidong nung kiralongrar telok ishika LoC nung renema lir, ta yashi onoki osang tejangja ka lazükba sülen yasüng ayaterm nung India army-i item tesemtem amak,” ta metetdaktsü.

Singh-isa, “Kiralongrartem anema operation aodang kiralongrar aser parnok pusemertem aika tepsetogo. Kiralongrartem nokdangtsü nükjidong aoba operations temogo. Iba dak alia operations maneni aotsü tebilemba mali,” ta ashi.

DGMO Singh-i ashiba agi, pai Pakistan Director General of Military Operations danga iba osang metetdaktsüogo.