Local organic market lapokba ajanga rongsenkettsüng renloktsü: ACAUT

Dimapur, Rongjui (September) 5 (TYO): Supermarket (Naga Shopping Arcade) Dimapur kübok local organic market lapokba atema ACAUT Nagaland-i pelar aser tenüngsang agütsür ta Media Cell sangdong ka nung metetdaktsü.
Iba mapa ajanga aluyimertem jenjang ajungketba dang masü saka asen state indang rongsenkettsüng tajungba akümtsü, ta ACAUT-i ashi.
Sorkari aluyimertemi aser local shishilembartem yaritsü atema ayongzüker aser Dimapur nung alirtemia iba local market nungittsü mepishir ta ACAUT-isa metetdaktsü.
Horticulture Dept, Development Authority of Nagaland (DAN) aser State Cooperative Bank longjemer local market ka kanga nüngdaka aliba lapoktetba atema tenüngsang agütsür. Linük ka akhüm atema rongsenkettsüng tsütsü nüjiso kanga tongtipang lir aser iba ya angateta NNPGs 6 teloki August 23, 2017 nü Naga Entrepreneurs dang nungi tax magitsü ta otsüsütsü aketba telemtetba agi.
Public Action Committee (PAC) Convener, Vekhosayi Nyekha-i iba local market ya ‘Tax Free Zone’ ta sangdongba atema pelar aser pusema nungiter. Taoba mapang local market tem tangari aser syndicate system-i amokbanga liasü saka tang lapokba local bazaar ya Naga nunger rongsenkettsüng atema lir, anungji iba shishilembadak nisung shingaia ozüng alema mapa meinyaktsü metetdaktsür. Maneni, Police Department dang iba shishilembadak security shitak agütsütsü mepishir, ta Media cell, ACAUT Nagaland sangdong ka nung metetdaktsü.