Lok Sabha aser Rajya Sabha naprongla nung senden meliteter

New Delhi, Metsüremi 08 (Agencies): Parliament senden tenzüker tanü agi anogo asemnübuba opposition party balala nungi züngsemtemi senden nung sen crore 12,600 dak sendakba Punjab National Bank (PNB) ochimashi densema tanga onüktem benoka longkak aitba ajanga Parliament House anaprong nung senden thinena liasü.
Lok Sabha Speaker, Sumitra Mahajan-i senden ka ayonga party balala nungi lenirtem jaoker Parliament senden junga kadaktsüsü atema mepishi, ajisüaka telemtetba tajung ka magitet.
Iba senden tembangba sülen osangbenertem den jembidang Biju Janata Dal (BJD) MP, Bhartruhari Mahtab-i, sorkari Rule 193 kübok o lemteptsü atema mepishi, ajisüaka opposition party temi ibaji magizük, ta metetdaktsü.
Mahtab-isa, “Ibaji magizük. Opposition-i adjournment motion kübok o lemtettsü akhanger. O toktepba mapang nung tawa bank dak sendakba ochimashi ken o ajak benoka o lemteptsüla,” ta ashi.
Osangbenertem den jembidang Parliamentary Affairs Minister, Ananth Kumar-i, Congress-i Rule 193 kübok o lemteptsü atema mepishi, aser sorkari ibaji agizük, ajisüaka tangbo parnok iba nungjagi jena aoer, ta aitsü.
Minister-isa, Speaker-i züngsemtem dang senden junga kadaktsütsü atema mepishi; laisa züngsemtem dang sabangleni arua longkak maittsü atema mepishi, ta metetdaktsü.
Bank ken o dena tongtibang onük aika nung o lemteptsü lir, ajisüaka senden junga makatetra item onük nung o lemtepttsüji tamakoktsü, ta paisa ashi.
Speaker-i ayongba senden nung shilem agia adener party tem rongnung Congress, Trinamool Congress, AIADMK, Aam Aadmi Party aser Shiv Sena densema party kar densema liasü.