Lok Sabha Congress züngsemi Speaker sabang nung o zülu zükdaka yutsü

New Delhi, July 27 (Agencies): Hombar nü Lok Sabha nung Congress züngsemi lungkak aita Speaker sabang nung o zülu (placard) tashii zükdaka yutsüba ajanga Sumitra Mahajan-i ajungbena senden ghonda ka asoshi anena ayu.

Senden nung Delhi High Court (Amendment) Bill, 2015 ken o tejembidak nung congress züngsemtemi External Affairs Minister Sushma Swaraj, Rajasthan Chief Minister Vasundhara Raje aser Madhya Pradesh Chief Minister Shivraj Singh Chouhan nunger anendakjang ta yimyim ayima lia, Lok Sabha nung congress züngsem, Adhir Ranjan Chowdhury-i pai ama aliba o zülu Speaker sabang nung tashii zükdaka yutsü.

Pai o zülu zükdaka yutsür langka ashi saka opposition-i yimyim ayimba ajanga pai ashiba kecha mangatet.

Ghonda ka sülen senden tenzükba mapang ano BJP züngsem kari Chowdhury anema apusoa liasü.

Iba yimyim ji Congress, Left aser TRS party tem nungi parnok nisung 30 shi-i o zülu amer ayima liasü.

Party pur yamaji yimyim ayimba mapang Congress nung Tatong Tir Rahul Gandhi-a sabangi atuba lenmang nung liasü aser Congress nung tekolak aser tetsü Sonia Gandhi den sensaksema angu.

Yimyim ayimertem jagi “Onoki achi obendang aginür” ta ayima liasü.