Lok Sabha election jelia Delhi nung AAP-Congress lokteptsü

New Delhi, Aami/June 02 (Agencies): 2019 küm Lok Sabha election atema yimtenren party tem kanga renemshiba mapang ka nung Ato kilonser, Narendra Modi-i aniba Bharatiya Janata Party (BJP) anema tokteptsü atema Congress-i tanga party aika den lokteptsü jembidar.
2015 küm Bihar Assembly election nung Congress-i anir ‘Mahagathbandhan’ teloktep yangluba sülen tawa Karnataka nung election osang sangdongba sülen Congress-i Janata Dal (Secular) den loktepogo aser maneni Delhi nunga parnoki Aam Aadmi Party (AAP) den lokteptsü atema tang tejembidak lir, ta osang angazüker.
Osang angazükba agi, Monupii (May) 24, 2018 nü AAP tenüng nung Jairam Ramesh aser Congress tenüng nung Ajay Maken na senden mena liasü.
Delhi nung AAP-i Congress dang lokteptsü atema asüngdang aser menden lemsaba ratio ji 5:2 (AAP menden 5 aser Congress menden ana) atema asüngdang.
Ajisüaka Congress-i menden tenet nungjagi menden asem akhanger. Menden asemji – Sharmishtha Mukherjee atema New Delhi, Ajay Maken atema Chandni Chowk aser Rajkumar Chauhan atema North West Delhi menden.
Küptoknü AAP tongti aser Delhi Chief Minister, Arvind Kejriwal-i Congress lenir aser taoba Ato kilonser, Manmohan Singh tenüngsanga jembiba ajanga party ana atangji lokteptsü südi ta bilemer.
Ato kilonser, Modi aija Kejriwal-i twitter ajanga, nüburtemi Manmohan Singh ama tazüngtashir Ato kilonser menungraa bilemteter, Ato kilonser kaji junga azüngba nisung ka asütsüla, ta metetdakja liasü.
2013 küm nungbo Kejriwal-i Manmohan Singh aija jembia liasü. Iba kümji Kejriwal-i, “Manmohan-i Congress telung nung aser pa sorkar nung ochimashi anema meinyaktet,” ta jembia liasü.
Ajisüaka tang linük tesem ajungalen BJP tashikang tuluba akümba ajanga yimtenren nung tsükchir party aika longjemdar.