Lok Sabha election mapang shidak nung agitsü: CEC Sunil Arora

Lucknow (Uttar Pradesh), March 01 (Agencies): India aser Pakistan na tsüngda tensa raksar aliba mapang ka nung tanü Chief Election Commissioner (CEC), Sunil Arora-i, Lok Sabha election mapang shidak nung agitsü, ta metetdaktsü.
Uttar Pradesh nung taruba General election atema terenemshiba reprangdangtsü atema CEC, Arora tanü agi anogo ananübuba state yimtiba, Lucknow nung mongdar.
Lucknow nung osangbenertem den jembidang pai, “Lok Sabha elections mapang shidak nung agitsü. Election commission indang tetuyuba tasenba nung- candidates-i linük aser bendanglen parnok indang kiojen aser rongsen osangtem metetdaktsütsü. I-T department-i ibaji mita reprangtsü, aser parnoki agutsüba osangji shidaka mesüra ibaji Election Commission (EC) website nung upload sutsütsü aser temerenshi tulu alitsü,” ta metetdaktsü.
Tangar jashidaktsütsüsa onük jembiba dak sendakba nung tasüngdangba ka langzüdang Arora-i, review senden alidang pai taoba election nung item ama ken otem reprangshiogo, ta ashi.
“EC-i kechisa bushitetogo, itemji ni chief secretary aser DGP na nem metetdaktsügogo, aser parnokia item ama ken o nung aibelener nem temerenshi tulu agutsütsü ta shiogo,” ta paisa ashi.
“Commission-i election kanga junga aginer aser iba dak sendakba nung tashishitsü lira iba atemaji commission-i inyaktsü,” ta pai ashi.
“Kobi melii C-Vigil app tenzüktsü, koba ajanga sensotemi election dak sendakba ken otem agutsütettsü, ajisüaka la/pa tenüng mesangdongtsü. Iba dak alia social media mita reprangtsü atema committee balala tentettsü,” ta pai ashi.
Tan Lok Sabha eletion nung polling centre 1,63,331 alitsü aser VVPAT machines amshitsü, ta paisa shisem.