Lok Sabha election nung BJP-i sen crore 90,000 indoktsü: Prashant

Bengaluru (Karnataka), March 31 (Agencies): Kanga nüngtugu Supreme Court lawyer aser ochimashi anema inyaker, Prashant Bhushan-i, taruba Lok Sabha election nung Bharatiya Janata Party (BJP)-i sen crore 90,000 shi indoktsüa akok, ta metetdaktsü.
Yashi Bengaluru nung Swaraj Abhiyan-i ‘Reclaiming the Republic` manifesto sayaba sentong nung jembidang pai, “2019 Lok Sabha elections nung sen crore lakh 1 shi indoktsü ta asadangtetogo, aser iba nungjagi shilem 90 bo BJP-i indoktsü,” ta metetdaktsü.
Tejashiba olen ka nung Bhushan-i, democracy aser elections ya sen lar kümdar, aser tanü putu nung election nung takok angutsü kuliji sen dang kümogo, ta ashi.
“Election atema fund nung ochimashi malitsü atema electoral tsütsü ozüng yanglushitsü nüngdaker. Linük kecha nunga electoral bonds ama ochimashi meputettsüsa hadir mali, ajisüaka India nungbo corporate aser foreign entities-i miima party nem senotsü agütsütetter,” ta Bhushan-i ashi.
Paisa, nisungtemi takok angutsüpur ka nem dang tetibo vote magütsütsüla, kechiyong ibaji ajanga democratic inyakyim nung tetsükdaktsü bener arutsür, ta ashi.
“Asenoki lenir tajung mangur, kechiyong nisungtemi candidate tajungtiba masü saka takok angutsüsa jenjang junga aliba candidate nem dang vote agütsür,” ta Bhushan-i ashi.
SC advocate-isa nüburtem dang democracy kümzüktsü atema pei vote temeden tajungtiba agi amshitsü ayongzük.
Pai ashiba agi, asen linük ya fascist linük ka akümtsüsa lir, aser vote agütsü nungang ibaji nokdangtettsü.
“India ya fascist linük ka akümtsüsa lir, anungji sensotem aser lokti tentettemi democracy kümtsütsü atema longjemtsüla,” ta pai ashi.
Swaraj Abhiyan atema manifesto ya Justice A.P. Shah, Gopal Gandhi, Prabhat Patnaik, Yogendra Yadav aser Harsh Mander nungeri renem.