Lok Sabha election nung Congress, JD(S) lokteper tokteptsü

New Delhi, Aami/June 01 (Agencies): Tawa Karnataka nung Congress aser JD(S) na lokteper sorkar akumba sülen maneni 2019 küm Lok Sabha election nunga party anati lokteper tokteptsü, ta tanü Congress lenir, KC Venugopal-i metetdaktsü.
Tanü Karnataka Chief Minister, H D Kumaraswamy (JDS)-i, Congress-JD(S) ministry nung züngsem ana Aami (June) 4 mesüra 5 nü tenangzükba agitsü, ta metetdaktsü.
Kumaraswamy den Deputy CM aser Pradesh Congress Committee tongti, G Parameshwara nati state Angh, Vajubhai Vala ajurua minister tasen ana tenangzükba agitsü atema anogo lemtettsü atema jembiogo.
“Onoki Amongnü cabinet ulushinüa liasü, saka Angh-i Delhi semdangtsü sentong jelia yanglur liasü,” ta Kumaraswamy-i metetdaktsü.
Angh majurudang Kumaraswamy, Parameshwara aser Congress General Secretary, K C Venugopal nungeri taoba Ato kilonser aser JD(S) tongi, H D Deve Gowda ajurua cabinet ulushitsü aser portfolio lemzüktsütsü atema senden mena liasü.
Karnataka CM atema tenangzükba agiba sülen anogo 10 jungogo, ajisüaka tang tashi CM, Kumaraswamy-i ano minister tem peria meshim.
Tang tashi Minister tem peria meshimba kuliji JD(S) aser Congress na tsüngda portfolio alemba nung tangatettep tajung ka dangi maruba ajanga lir.
Monupii (May) 23, 2018 nü Chief Minister denbo Deputy Chief Minister, Parameshwara na dang tenangzükba agia liasü.
Chief Minister menden atema tenzangzükba agiba sülen Monupii 25, 2018 nü Kumaraswamy-i assembly nung majority sayua liasü.