Lok Sabha-i Mirza o Paes na nem tetushi agütsür

New Delhi, July 22 (Agencies): India’er tennis asayar mongin, Sania Mirza, Leander Paes aser Sumit Nagal nunger den külemi, golf asayar, Shubham Jaglan nem tetushi agütsüba sentong ka Lok Sabha nung tanü Bodbar nü agiogo.
International sabang nung takok marok agizüka India nem konang tulu bener arutsüba ajiteta parnok nem tanü tetushi agüja liasü.
Mirza, Peas aser Nagal nungeri tawa Wimbledon takok marok agizük aser Jaglan-i US nung ayongba Junior World Golf Championship takok marok angu.
“Mirza-i Wimbledon tetsür doubles shilem indang takok marok agizüka iba takok marok agizüker mezüngbuba India tsür akümba atema la nem tetushi agütsür,” ta Lok Sabha Speaker, Sumitra Mahajan-i tanü sentong nung ashi.
“Paes-i Wimbledon mixed doubles takok marok aser arishi küm 17 tain Nagal-i Wimbledon junior doubles takok marok agizükba atema tena nema tenüngsang agütsür,” ta lai metetdaktsü.
Arishi küm 10 tain Jaglan-ia US kübok San Diego nung Junior World Golf Championship takok marok agizükba yong pa nema tetushi agüja liasü.