Lok Sabha menden atema NDPP aser NPF tokteptsü

Commissioner & RO M Patton-i General Observer tem aser Political Party balala den senden amendang agiba noksa angur.

Kohima, Monupii (May) 14 (TYO: Nagaland nung Monupii (May) 28 nü Lok Sabha by-election atema tenüng agütsüba mapang süiogo aser iba election nung Nationalist Democratic Progressive Party (NDPP) aser opposition Naga People’s Front (NPF) tsüngda tokteptsü.
NDPP-i yimsüsür tejen Tokheho Yepthomi toktepdaktsür. Pa ya People’s Democratic Alliance (PDA) sorkar indang külem candidate lir. PDA nung NDPP MLA 18, BJP 12, NPP 2 aser JD(U) o Independent MLA ka ka dena lir.
Ano külen, opposition NPF nunga MLA 26 lir aser parnoki taoba Rajya Sabha MP aser ex-MLA, C Apok Jamir toktepdaktsür.
Taoba MP Neiphiu Rio-i state Assembly election nung shilem agitsü lemtetba ajanga menden toktsü aser iba jagi Lok Sabha by-election agitsüsa akümer.
Candidate anaprongi tenüng meyipa agitsü mapang tembang tashi nung tenüng meyipa magi, ta Nagaland Commissioner & Returning Officer, M Patton-i tanü nikongdang ashi.
Monupii (May) 16 nungi political party temi election nüboyimba sentong tenzüktsü akok aser tanü M Patton-i ashiba agi, Nagaland nung Lok Sabha by-election agitsü atema renema lir.
Tanü Returning Officer-isa candidate tem aser political party ajak den senden ka amen.
Tanü senden nung candidate anaprong medentet saka tena atema election agent tem aser party teshimtet nübotem aden.
Senden nungsa Election Commission of India-i mapa lemzüktsüba general observer ka den expenditure observer ana aden.
Senden nung election tiptema agitsü atema jembi aser candidate tem den political party tem dang Rongchii (April) 26 nungi tenzükba model code of conduct sülen anidaktsü atema mepishi, ta Patton-i ashi.
Election duty atema mapa lemzüka aliba sorkar ketdangsertem nem postal ballot melena Election Duty Service (EDS) agütsütsü, ta paisa metetdaktsü.
Lok Sabha by-election mita reprangtsü atema ECI-i observer pungu mapa lemzükja lir aser ano observer talila yoktsü imlar. ECI-isa candidate temi election dak sendakba senotsü endokba osang agütsütsü atema DC Kohima Nodal officer inyaktsü shimogo, ta Returning Officer-isa ashi.
General Observer, Dr. J. Ravishankar, IAS-i political party aser sendaka alir ajak dang ECI telatetbatem sülen anidaktsü aser election timi agitsü atema ayongzük.
Expenditure Observer tem- Tsewang Tharchin aser Michael Achom nati senotsü dak sendakba osang metetdaktsüdang, political party ajaki sen endokba osang agütsütsüla aser candidate ka atema election expenditure ji sen lakh 75 lir, ta ashi.
Candidate temi sen endokbaji observer temi asemben reprangtsü aser sorkari latetba jenjang ama candidate temi endoktsüla, ta tenatisa ashi.
Nagaland nung Lok Sabha election mapang security dak sendakba mapa ketdangsüa reprangtsü atema Police observer, Girija Shankar Jaiswal mapa lemzüktsüogo.